DILI, (timorpost.com) — Polísia Tránzitu hetan deña rute desportivu la’o ain, maratona ho diresaun husi edifísiu MNEK, Pantai Kelapa to’o Rotunda Metiaut, hodi kontrola no hapara temporáriu sirkulasaun transporte públiku.
Timor Post rekolla informasuan husik Komisaun Organizadora ba selebrasaun loron Proklamasaun Independénsia 28 Novembru 2023, ba dala-48, katak atividade desportivu hanesan la’o-ain, maratona, halai no kurida bisikleta, ne’e sei hala’o aban Sábadu (25/11/2023) husi edifísiu MNEK Pantai Kelapa to’o Rotunda Metiaut-Dili.
“Komandu hatún ona orientasaun para parte operasaun Komandu Munisípiu Dili simu no kontinua orienta membru parte operasionál, tránzitu atu fó seguransa ba atividade desportu la’o-ain, halai, halaib bisikleta, maratona ne’ebé komisaun atu organiza iha Sábadu, 25/11, ne’ebé husi dader tuku 6:00 to’o fali besik meudia 11:00 ami-nia tránzitu sei hapara movimentu transporte públiku husi diresaun estrada MNEK Pantai Kelapa to’o Rotunda Metiaut, ne’e sei hapara temporáriu”, Komandante Seksaun Operasaun Polísia Nasionál Timor-Leste (PNTL) munisípiu Dili, Inspetór Xefe Polísia, José Luis Amaral, informa ba Timor Post, iha edifísiu Autoridade Administrasaun Munisípu Dili, Matadoru, Sesta, (24/11/2023).
Tanba ne’e Komandante Operasaun Munisípiu Dili, husu ba transporte públiku, privadu, liuliu karreta ho motorizada ne’ebé halai husi diresaun estrada Pantai Kelapa MNEK, Lesidere, BJ Habibie, Bidau Santana to’o Rotuda Metiaut atu para temporáriu.
Aleinde ne’e husi rute sira ne’ebé atividade desportivu organiza ba sei hetan kontrolu husi polísia operasionál no tránzitu atu nune’e eventu desportivu ba selebrasaun loron Proklamasaun Independénsia 28 Novembru 2023 ba dala-48, bele la’o iha páz no estabilidade nia-laran.
“Ami-nia membru hotu-hotu sei fó seguransa inklui tránzitu, nune’e mós apoiu husi Unidade Espesiál no Unidade Marítima, para eventu desportu ba komemorasaun 28 Novembru 2023, dala-48 la’o no páz no estabilidade nia-laran”, Inspetór Xefe Polísia José Luis, hatete.
Enkuantu eventu ne’e sei partisipa husi lideransa nasaun ida-ne’e, parséiru internasionál sira, komunidade inan-aman, joven no estudante iha sidade Dili hodi anima atividade refere.(*)
3,120 total views, 9 views today
Bele hare Video Seluk :
Subscribe to Timorpost
