KOVALIMA, (timorpost.com)— Gafinotu rihun ba rihun daudauk ne’e atake to’os no natar komunidade nian iha aldeia Beilaku, suku Raimea, postu administrativu Zumalai, munisípiu Kovalima.
Tanba ne’e, komunidade iha suku Raimea inklui suku sira ne’ebé besik iha tinan ida-ne’e tauk halo natar tanba ta’uk gafinotu estraga hotu.
“Husi gafinotu estraga ne’e halo natar barak mak abandona tamba ta’uk gafinotu estraga hotu, liuliu iha área Beilaku nian”, Custódio de Deus Lopes, nu’udar agrikultór informa ba Timor Post via WhatsApp ohin (26/03).
Nia dehan, gafinotu ne’e estraga hotu komunidade nia to’os no natar liuliu batar no hare, inklui ai-han seluk ne’ebé komunidade kuda iha to’os laran.
“Sim, han batar sai tiha hanesan ne’e, iha aldeia Beilaku, suku Raimea, postu administrativu Zumalai, maka’as liu iha Beilau no área sira besik ne’e hanesan Harekain ho Bebora nian”, nia dehan.
Gafinotu ne’e mosu iha fim fulan-Feveréiru nian no tuir informasaun katak mosu de’it husi tasi mak sa’e ba komunidade nia to’os.
Ho problema ne’e komunidade hato’o ona ba parte Ministériu Agrikultura nian iha munisípiu Kovalima, no extensionista sira rega ona aimoruk maibé gafinotu mak barak demais, tanba ne’e daudauk ne’e kontinua barak.
Parte lia-nain sira iha suku Raimea, postu administrativu Zumalai nian mós halo tuir ona adat iha suku refere nian, atu oinsá mak gafinotu labele estraga komunidade nia to’os no natar iha área refere.(*)
5,679 total views, 3 views today
Bele hare Video Seluk :
Subscribe to Timorpost
