Baukau (timorpost.com) – Ohin loron 28 fulan outubru, populasaun Timor-Leste hahu realiza eleisaun suku hodi hili autoridade lokal sira. Nune´e iha tuku 9h00 dader komunidade husi suku Baha-Mori, Venilale, Baucau ho entusiamu hakat ba sentru votasaun, maibé mosu fallansu iha boletim voto, tambá kandidatu ida nia foto okupa fali kandidatu ida seluk nian. Parte meza eleitoral base nian buka hela dalan atu rezolve.
Ana Juvita da Silva, Presidente da Mesa, hateten katak lolos ohin tuku 9h00 dader komesa ona eleisaun. “Tambá kandidatu xefe suku balun foto dobru tiha iha boletim de voto”, katak Presidente da meza ba Jornalista Timor Post.
Presidente meza mos hatete katak sira kontaktu ona ba parte STAE Munisipiu Baucau nian hodi buka solusaun. “No agora ami hein hela sira mai atu rezolve. Vota agora ka muda ba loron seluk ami prontu koopera”, hatete Ana Juvita da Silva.
Tuir presidente meza, fallansu ida ne´e mai husi nasional, tambá uluk dia 13 outubru kandidatu xefe suku sira mai hatama dokumentu sira ho kedas sira nia foto ho medida 3X4. Iha suku Baha-Mori kandidatu ba xefe suku hamutuk ema na´in neen (06) ne´ebé mak ho jéneru mane de´it.
Iha sorin seluk, informasaun ne´ebé mak Timor Post rekolla iha terenu katak boletim de vota agora dadauk komesa produz fila fali ona iha Ministério Administração Estatal iha Díli nune´e sei lori fali foun ne´e mai suku Baha-Mori hodi realiza kedas vota iha loron ne´e kedas.
Nune´e mos tuir observasaun Timor Post iha terenu, kandidatu ba xefe aldeia no delegadu ho delegada sira mos realiza ona sira nia kampaña.
1,221 total views, 12 views today
Bele hare Video Seluk :
Subscribe to Timorpost
