Domin iha diresaun 3: Ba Maromak, ba maun-alin sira no ba an rasik
(Reflaxão badak ba domingo XXX tempo komun nian. Ex. 22, 21-27; Sal. 17; 1Tes. 1, 5-10; Mt. 22, 34-40)
Hosi: Luis Pereira S,J
Kontexto!
Horseik ita halo elisaun ba chefes sucos, iha ita ida-idak nia suco. Chefes Sucos mak autoridade lokais ne’ebe besik ba povo. Sira mak matan, tilun, ibun governo nian ba povo no povo nian ba governo. Entre qualidades ukun nain ida nian, qualidade ida ne’ebe ema hot-hotu hein no hakarak husi chefe suco ida mak hatene hadomi nia povo.
Liturjia domingo XXX tempo komun nian, aprezenta mai ita tema bot:DOMIN núdar ukun fuan bót liu. Hadomi Maromak ho fuan tomak, ho neon tomak no ho hanoin tomak. Hadomi maun-alin sira hanesan hadomi an rasik. Ida ne’e mak rezumo husi lei hotu ne’ebe Jesus halo no fo ba fariseu sira, ba discipulo sira no ba ita ida-idak.
Tansa Jesus fo ukun fuan fuan bot liu ne’e? Tamba ida ne’e mak essense/isin no klamar husi ita nia fiar. Jesus hatene katak, so domin de´it mak kesi ema hamutuk ho Maromak, kesi ema hamutuk ho nia maluk sira no kesi nia an rasik. Domin deit mak halo ema sira metin iha sira nia missão no sira nia serbisu.
Domin ida ne´e mos mak kesi Jesus ho Nia Aman no halo Nia metin to’o fila hikas ba Aman. Jesus, hadomi nia Aman laós ho lia fuan de´it, maibé ho ninia moris rasik. Domin ida ne’e, mak Nia husik hela ba discípulo sira. Nuné mós, domin ida ne’e mak, Jesus hanorin no husik hela mai ita hotu nudar ukun fuan bót liu.
Ponto 3 ita bele reflete:
- Hadomi hanesan Jesus hadomi!
Hadomi Maromak ho fuan, ho neon no ho hanoin tomak. Ida ne’e mak primeiro no essensial. Maibé, domin ba Maromak n ne’e tenki traduz/konkretiza iha domin ba maluk sira. Oinsa ita hadomi? Jesus rasik dehan hadomi malu HANESAN ha’u hadomi imi. Ita nia sasukat domin nian mak Jesus nia domin. Tan ne’e, só ema nebé konhece, hadomi no lao tuir Jesus Cristo de’it mak, bele hadomi nia belun eh nia maluk sira. Basá, domin ida anchorado iha Jesus Cristo mak domin ida ne’e duni: fó la sukat, fó la espera atu hetan fali, fó ho moris rasik no fó ho an tomak. Hanesan Santo Inácio de Loyola dehan fó no la sura o nia kolen (To give and NOT to count the cost). Fo to’o fo ne’e hakanek. Maibe kanek tan domin, nia la moras no nia lori ksolok.
- Proteje no kuidado ema seluk!
Leitura dahuluk husi Livro Exodo haktuir konaba hadomi ema lao sira, hadomi feto faluk sira no hadomi ema kiak sira. Hadomi sira katak la explora no la fo terus sira. Sira preciza kuidado no protesaun tamba sira mak ema sira vulneravel no Maromak rona sira nia orasaun. Ta ne’e, se ita proteje no kuidado sira, ita fo garantia konaba justisa no igualidade. Nune, ita nia domin ba Maromak expressa liu husi fo protesaun no kuidado ema sira ne’ebé kbít laek iha sociedade.
- Exemplo moris!
Domin laos koalia deit, maibe preciza hatudo iha hahalok konkreto liu husi halo diak. Ida ne’e mak haktuir husi leitura daruak husi Saun Paulo nia surat ba sarani sira iha Tessalónica. Saun Paulo louva sarani Tessalonica tamba sira nia exemplo moris. Sira konverte an husi maromak falso sira hodi serbi Maromak Moris/Deus Vivo. Ida ne’e hatudo katak sira simu fiar no evanjelho ho diak.
Ita hotu nebé simu ona batismo, simu ukun fuan bot liu: hadomi Maromak no ema seluk husi Jesus Cristo, nu’udar missão ida hodi haklaken Nai nia lia fuan diak no nia domin ne’ebé kesi metin ita nia tali aliança nian ho Nia, liu husi lia fuan no hahalok ba ita nia maun alin sira. Tan ne’e, passo dahuluk mak buka hatene Jesus, nia moris, hadomi nia, no lao tuir nia. Ho nune’e de’it, mak missão ne’ebé ita halo iha abut ne’ebé metin no sei fó resultado ne’ebé diak. Ita husu graca, atu ita mos bele hanoin hanesan Jesus hanoin, mehi hanesan Jesus mehi no hadomi hanesan Jesus hadomi, (tuir cantico Pe. Zezinho nian); atu nune’e, ita lori malu ba Aman Maromak nia domin.
Mai ita hatais ukun fuan bót liu ne’e, ne’ebé Jesus hanorin no husik hela ba fariseu sira, ba nia discípulo sira no ba ita ne’e. Ita hotu ne’ebe hanaran-an cristão, ukun fuan bót liu no mandamento foun ne’e, tenki sai ita nia ‘BI’. So nune’e deit, mak UKUN-FUAN ne’e, hela iha fuan no ukun duni ita. UKUN uluk lai ita FUAN atu bele UKUN-AN tomak. Amen!(lupersj)
(Hakerek nain Jesuita, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá!)
2,028 total views, 3 views today
Bele hare Video Seluk :
Subscribe to Timorpost
