DILI (timorpost.com) – Kompañia Grand Enclave Unipesoal.Lda, mak sai manan na’in ba projetu konstrusaun Igreja kulturál Nunu-Henu, suku Cunha, sub-rejiaun Pante Makasar, Rejiaun Administrativa Espesial Oe-cusse Ambeno (RAEOA) iha tinan 2021, maibé to’o ohin loron seidauk finaliza.
Timor Post asesu dadus sira hosi pájina RCAL katak, iha loron 25 fulan Novembru 2021, Prezidente Autoridade RAEOA, Arsénio Paixão Bano hamutuk ho nia estrutura ba lansa projetu konstrusaun igreja kulturál Nunu-Henu, maibé to’o ohin loron kompañia Grand Enclave Unipesoal.Lda seidauk finaliza projetu konstrusaun ne’e.
Projetu konstrusaun Igreja Nunu-Henu ho númeru kontratu 232/2021/PA/RAEOA-ZEESM, ho nia durasaun fulan haat ka loron 120, tenke entrega ona ba Autoridade RAEOA, iha fulan Fevereiru 2022.
Konstrusaun Igreja Nunu-Henu ne’e hamutuk ektare 22 área semitériu inklui kapela metru kuadradu 15×12 no 7×24. Nune’e mós hariis fatin unidade rua ho medida metro 3×6 ho total área metru kuadradu 18 no postu seguransa unidade rua ho medida metru 2,5×2,5 ho total área metru 6,25.
Iha projetu refere mós kompletu ho lutu hale’u fatin turizmu kulturál ne’e ho kilómetru 1.870, inklui mós portaun rua, ida ho medida metro 11 no ida seluk metru 6,5, maibé realidade hatudu katak, kompañia Grand Enclave Unipesoal.Lda, seidauk finaliza projetu ne’e.
Entretantu, projetu konstrusaun Igreja Nunu-Henu ezekuta husi kompañia Grand Enclave Unipesoal.Lda iha 2021, ho valor kontratu 440,844.10 USD ne’ebé autoridade RAEOA aloka hosi Orsamentu Jerál Estadu (OJE) 2021 ho durasaun servisu durante loron 120.
1,836 total views, 6 views today
