DILI, (timorpost.com)— Governu liuhosi reuniaun Konsellu Ministru aprova Projetu Proposta Lei (PPL) kona-ba Kódigu Propriedade Industriál, ne’ebé aprezenta husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, no Vise-Ministru Komérsiu Augusto Júnior Trindade, iha reuniaun horseik, (20/03).
Komunikadu imprensa ne’ebé Timor Post asesu ohin (21/03) liuhosi portál Governu Timor-Leste nian katak, maske Lei n. 14/2022 aprova ona Kódigu Direitu Autór no Direitus Koneksus, maibé lejizlasaun kona-ba propriedade industrial seidauk regulamenta iha país ne’e. Lakuna ida-ne’e aborda husi artigu da-1223 husi Kódigu Sivíl, ne’ebé rekoñese nesesidade lejizlasaun espesiál kona-ba direitus propriedade industriál.
Propriedade industriál abranje protesaun invensoins, dezeñu industriais, markas, no sira seluk, no hala’o papél krusiál ida iha dezenvolvimentu nasionál, liuhusi insentiva inovasaun no kriatividade. Regulasaun ba setór ida-ne’e maka fundamentál atu promove ekonomia no atinje Objetivu Dezenvolvimentu Sustentável. Importante atu hatete katak propriedade industriál la limita de’it ba indústria tradisionál, maibé mós ba indústria agrikultura, extrativas no produtu manufaturadu ka naturál sira hotu, hanesan indika ona iha Konvensaun Paris kona-ba Propriedade Industriál.
Protesaun ba direitu sira-ne’e’ promove ambiente emprezariál ida ne’ebé favoravel ba inovasaun, aleinde garante kompetitividade iha merkadu globál. Partisipasaun Timor-Leste iha ekonomia mundiál presiza adosaun norma internasionál ba propriedade industriál, hanesan ezije ona husi adezaun ba Organizasaun Mundiál Komérsiu. Projetu lei ida-ne’e ho objetivu atu armoniza prátika nasionál ho padraun internasionál, no fornese kódigu ida ne’ebé modernu no efikás.
Kódigu Propriedade Industriál iha artigu 282, ne’ebé inspira husi direitu komparadu no kompromisu internasionál sira ne’ebé Timor-Leste asume ona, no hanoin kona-ba kestaun hotu ne’ebé relasiona ho propriedade industriál, ne’ebé fasilita kompriensaun no uza hosi ema hotu iha sira nia atividade sientífiku, kriativu no ekonómiku, presiza atu uza kódigu ne’e.(*)
2,037 total views, 3 views today
Bele hare Video Seluk :
Subscribe to Timorpost
