Dili (Timor Post) — Negosiante Agusta Gonçalves, husi Munisípiu Ermera, Postu Administrativu Atsabe, Suku Lasaun, Aldeia Hatibu, afirma nia sente kontente ho nia fila liman ka negósiu ne’e, tanba hetan rendimentu di’ak atu nune’e dezenvolve nia an no sustenta nesesidade uma laran.
“Moris iha mundu ne’e la depende ba Mane, feto, klosan ka kaben na’in, maibé tenke esforsu an hodi sustenta moris nian atu nune’e ita labele tane liman ba ema seluk”, nia hateten ba Timor Post Online iha estrada Públika Area Tasi-Tolu, Sábadu (13/08).
Nia dehan, bainhira esforsu ho kosar been rasik ho buat ne’ebé hakarak kria, sei hetan rezultadu ne’ebé di’ak ba moris rasik.
Nia hatete, nia hela iha area Tasi-Tolu ne’ebé dadersan tuku 5:00 madrugada nia sai husi koos ka uma hodi mai fa’an sasán iha estrada ninin area Tasi-Tolu, to’o tuku 7:00 Otl kalan maka foin fila ba uma.
“Ha’u sente kontente tanba hetan rendimentu di’ak, no loron tomak ida ha’u bele hetan 15 USD, nune’e ha’u-nia sasán sira maka hanesan Agua, Sukro, Supremi, Minuman ki’ik hanesan Frees Tea, Grasse, Biskoit no Sigarru, maski sasán la barak, maibé ha’u kontente ho ha’u-nia negósiu ne’e, loro-loron hetan rendimentu Ki’ik, maibé importante kada loron ema mai sosa ha’u-nia sasán”, nia dehan.
Nia konta nia hala’o negósiu ne’e foin primeira vés, portantu sasán sira ne’e, nia ba sosa iha loja terminal Tasi-Tolu, depois mak lori mai fa’an fali.
“Ha’u fa’an sasán sira ne’e, hotu osan sira ne’e balun ha’u rai hodi sustenta ha’u presiza loro-loron, no balun ha’u haruka ba ama sira iha foho hodi sustenta nesesidade família uma laran ka atende lia moris no lia mate”, Agusta dehan.
Enkuantu sira hakarak atu fa’an sasán iha merkadu laran, maibé fatin maka la iha, entaun nia deside fa’an fali iha estrada ninin de’it.
“Ha’u fa’an iha estrada ninin ne’e, maski rai rahun no anin boot, maibé ha’u tuur pasiénsia de’it ho ha’u-nia negósiu ne’e, tanba ha’u maka hakarak buka osan no nesesita ha’u-nia an rasik”, nia hakotu.
1,978 total views, 3 views today
Bele hare Video Seluk :