DILI (Timor Post) – Partidu Sosialista Timor (PST) realiza Konferénsia debate kona-ba polítika ideolójika ba joven sira ho tema “Partidu Sosialista Timor-Leste departementu orientasaun Polítika Ideolójika”.
“Atividade ohin iha ámbitu Partidu Sosialista Timor (PST) hari sentru formasaun polítika ideolójika Akita TAMA LAKA, maibé Sentru formasaun ne’e lahalo rasik, maibé formasaun debate, tanba ne’e fó formasaun polítika debate ba joven sira hodi nune’e orienta ita-nia pensamentu polítika Ideolójika”, Prezidente Partidu Sosialista Timor (PST), Avelinho Coelho, hateten hafoin remata serimónia konferénsia iha Salaun CNE, Kaikoli, Sábadu (13/08).
Nia dehan, atu muda nasaun ida ne’e, agora rona ema hot-hotu halerik hanesan sasán folin sae, entaun ema barak iha preokupasaun, ida maka problema mosu tanba polítika sala, Polítika sala se maka sala, maibé Polítika sala ne’e ema ne’ebé hot-hotu vota ba ne’e mak hala’o polítika sala.
Entaun presiza orienta ema hotu nia hanoin katak situasaun sira bele muda, maibé atu muda bainhira muda lei. Portantu se maka atu muda Polítika no muda lei tenke ema hili no ema ne’ebé iha konesimemtu no polítika.
“Entaun PST nia obrigasaun, nu’udar liu bareira no la liu bareira la signifika buat ida, maibé oinsá maka Partidu kria mekanizmu atu sensibiliza ema hotu liuliu joven sira iha rai laran, tanba joven asesu ba iha informasaun teknólojia, konesimentu hodi muda Perspetiva eleitotál. Entaun Konferénsia ida ne’e kona-ba konferénsia debate Partidu polítika nia hanoin ne’ebé ohin ami ho joven sira diskute”, nia hateten.
Nia dehan, Partidu sira sei prepara joven atu ukun, tanba ne’e mak PST aposta ona ba juventude tanba uluk sei joven ita liberta rai, ne’ebé agora fó tempu ba sira no oinsá maka fó fali Energia ba joven sira, maibé sira atu liberta rai ida ne’e, tenke iha konesimentu sientifiku.
Tanba ne’e nia dehan, responsabilidade Partidu Sosialista Timor nian, mak atu kontinua ba iha Munisípiu sira hotu.
1,041 total views, 3 views today
