Vizita Korea Súl no Singapura (Parte I)
(timorpost.com)-Iha loron 31/06/2023 Prezidente Repúblika José Manuél Ramos Horta ho delegasaun semo ho Aviaun Aero Dili liuhusi Dempasar-Bali hodi liu ba Korea Súl no kontinua ba Singapura.
Durante loron lima sura ho loron viajen nian, Prezidente Repúblika akompaña husi Ministra Negósiu Estranjeiru no Kooperasaun (MNEK), Adalzija Magno no Prezidente Autoridade Nasionál Petróleum no Minerál (ANPM), Florentino Soares Ferreira ho delegasaun inklui jornalista husi mídia Timor Post, GMNtv, Ajénsia Lusa no SMNews.
Durante viazen, hahú kedas liuhusi Bali, iha Aeroportu simu ho profesionál tebes husi autoridade seguransa hodi deskansa uitoan oras to’o aviaun semo ba Aeroportu Internasionál Incheon, Korea-Súl.
Iha Incheon simu ho kuidadu kedas husi seguransa parte rai ne’e nian ho karreta kontinua ba sa’e aviaun iha Aeroportu Gumi hodi liu ba Illa Jeju (Jeju-do).
Iha Jeju nu’udar fatin destinasaun ba objetivu vizita nian, iha loron tuir mai partisipa forum hanaran Jeju ne’ebé partisipante husi nasaun sira hotu ASEAN nian, Ramos-Horta hetan atensaun ema hotu nian. Iha kedas otél LOTTE, Ramos-Horta hetan kedas vizita husi bainaka sira no haan kalan hamutuk ho Governadór Jeju-do.
Iha forum Jeju hala’o iha loron 2/06/2023 hatudu iha realidade, Ramos Horta iha intervensaun dada atensaun hotu no hatudu diplomata senior timoroan ne’e la’ós de’it povu Timor Leste nia prezidente maibé (figura) pesoa mundiál ne’ebé hetan respeitu boot tebes.
Premiadu Nobel da Paz ne’e iha ninia diskursu sempre toka preokupasaun sira kona-ba pás hodi fó hanoin ka hafanu hela de’it kona-ba importánsia diálogu no aprosimasaun pasífika maka prezisa hodi rezolve kestaun hotu-hotu maka mosu liuliu iha moris povu reziaun ida ne’e nian.
Iha forum diferente rua Jeju-do – Korea Súl no Shangri-La Singapura, Ramos –Horta hatoo ninia apelo kona-ba asuntu mundu global, ein jeral no ein espesial ba Asia hanesan, kona-ba analize lei internasional maka regula asuntu tasi / marítimu, no refere ba “South China Sea. Katak tenke halo Tasi South China Sea hanesan zona ne’ebé maka seguru no iha pás.
Bainhira temi hela de’it kona-ba isu alterasaun klimátika ho temi kona-ba privasoens ne’ebé povu barak iha reziaun sei sente iha sira ninia moris, tanba problema falta bee moos, agrikultura, seguransa alimentar, revela klean tebes preokupasaun Ramos-Horta atu líderes iha nasaun ASEAN tenke asegura pás, estabilidade, seguransa no bem-estar ema nian.
Momentu Ramos-Horta termina ninia diskursu iha Jeju Forum ne’ebé partisipa husi membru hotu husi ASEAN, Eis Sekretáriu Jerál Nasoens Unidas, Ban Ki Moon apresia no konsidera Ramos-Horta hanesan líder ne’ebé inspirativu no sempre fó motivasaun sira kona-ba solusaun mundiál.
Durante vizita iha Korea Súl no Singapura, Ramos-Horta hasoru mós kompaña boot sira iha rai rua ne’e liga ho investimentu iha tasi no teknolojia.
2,321 total views, 6 views today
