DILI (Timor Post)- Ministru Koordenadór Asuntu Ekonómiku (MKAE), Joaquim Amaral Alerta ba kompañia sira ne’ebé fahe sesta bázika tenke kumpre Regra ne’ebé Governu tau ona iha Dekretu Lei.
“Sesta bázika hahú ona faze dahuluk, tanba ne’e ha’u husu ba ita-nia kompañia sira atu tau prioridade másimu ba ita-nia produsaun nasionál tuir kritériu ne’ebé Governu tau ona iha Dekretu Governu nian,” nia hateten iha Palásiu Governu, Tersa (05/07).
Nia dehan, asuntu ne’e ohin nia parte ko’alia nafatin ho Primeiru Ministru, hodi kontinua alerta hotu-hotu ba Ministériu sira ne’ebé implementadór.
“Tanba lansamentu distribuisaun ba Sesta Bázika la’o hela ona iha fulan ne’e nia laran, iha semana ikus fulan kotuk ne’e mós distribuisaun la’o hela,” deklara nia.
Nia esplika, iha Dekretu Governu ne’e dehan Sesta Bázika ne’e porsentu 75 sei prioridade ba ai-han lokál no produsaun rai laran, tanba ida ne’e hanesan alvu tenke kumpre.
“Tanba ne’e Ministériu implementador sira no kompañia distribuidór sira tenke kumpre tanba foin ínisu distribuisaun, kuandu iha klaran la to’o ona produsaun rai laran laiha ona mak bele buka fali solusaun seluk,” nia afirma.
2,425 total views, 3 views today
