Durante Estado Emerjénsia “Ai ba Futuru” fahe pakote ai-han ba uma-kain vulnerável 200 iha Dili, liu-liu ba sira ne’ebé afetadu liu hosi efeitu ekonómiku tamba surtu COVID-19. Iha tempu hanesan mós, “Ai ba Futuru” apoia agrikultór sira iha Baucau, Manatuto, Lautem ho Viqueque liu hosi sosa produtu ai-han ne’ebé sira rasik maka prodúz no sei fahe ba uma-kain vulnerável sira.
Timor Post (05/06/2020) – “Ai ba Futuru” – Parseria ba Agrofloresta Sustentável (PSAF), projetu ko-finansiadu hosi Uniaun Europeia no Ministériu Federal Alemaña ba Kooperasaun Ekonómika no Dezenvolvimentu (BMZ), dezeñadu atu kontribui ba hadia agrikultór sira nia moris, fahe ona pakote ai-han 200 ba família vulnerável sira iha Dili.
Komunikadu ba imprensa ne’ebé Timor Post asesu, Sesta (05/06/2020) husi Gabinete Uniaun Europeia iha Dili haktuir, pakote ai-han ne’ebé fahe inklui variedade ai-han ne’ebé balansu no nutritivu: fós, batar, fore ho tipu oi-oin, fehuk-midar, manutolun, lakeru no mina nú. Atu bele iha impaktu pozitivu ba komunidade rurál sira no apoia agrikultór sira ne’ebé involve iha projetu “Ai ba Futuru”, sosa deit produtu ne’ebé prodúz duni iha Timor-Leste no ai-han barak liu maka sosa diretamente hosi sira ne’ebé hola parte iha projetu.
Wainhira NGO FUNDEF halo distribuisaun material ijiene báziku ba uma-kain sira iha Dili, sira deskobre katak família barak maka hasoru situasaun inseguransa ai-han/falta ai-han ne’ebé makás. Nune’e mos FUNDEF hetan relatóriu hosi Polísia Nasional Timor-Leste durante hala’o patrullamentu iha estrada, identifika uma-kain barak maka presija asistensia ai-han urjente. Pakote ai-han ne’ebé “Ai ba Futuru” prepara, sei entrega hosi FUNDEF nia staff sira atu bele ajuda ultrapassa problema ne’ebé família vulnerável sira hasoru hela iha tempu difisil ida ne’e. Hotu tiha ida ne’e, fulan ida tuir mai sei halo dala ida tan distribuisaun pakote ai-han 200 ba uma-kain sira iha Dili.
‘’Uniaun Europeia expresa nia solidaridade ba ema hotu ne’ebé afetadu hosi surtu COVID 19 iha Timor-Leste. Iha momentu ida agora, ita presija asigura katak laiha ema ida maka husik hela ba kotuk, no ita buka apoia familia vulnerável ho labarik sira ne’ebé afetadu liu”, hateten hosi Andrew Jacobs, Embaixador Uniaun Europeia ba Timor-Leste.
‘’Ita haree katak asesu ba ai-han importante tebes durante tempo ida ne’e. Hau sente kontenti tanba ita ajuda maluk sira ne’ebé sofre maka’as ba surtu COVID 19 liu hosi fahe pakote ai-han. Liu-liu tan tamba agrikultór lokal sira duni maka prodúz ai-han hirak ne’ebé distribui ona, no ne’e hatudu sira nia kbi’it atu kontribui signifikamente ba seguransa ai-han iha Timor-Leste” tenik Rainer Schellhaas, Koordenadór GIZ nian iha Timor-Leste.
Projetu Ai ba Futuru implementa iha munisípiu hát iha parte leste (Baucau, Lautem, Manatuto ho Viqueque), ho fóku ba uma-kain marjinalizadu 4,000 iha Suku 40 ne’ebé selesionadu. Projetu ne’e mós buka atu hasa’e área ba agrofloresta nian iha Timor-Leste to’o 6,000 ektár, sei kuda totál ai hamutuk millaun tolu. Partisipante iha projetu benefisia husi produsaun ne’ebé aumenta, oportunidade empregu ne’ebé diak liu no hadia asesu ba merkadu, para bele hétan rendimentu ne’ebé ás liu. (*cao)
1,436 total views, 3 views today
Bele hare Video Seluk :
Subscribe to Timorpost
