Dili (timorpost.com) – Partisipante sira husi Munisípiu 12 no Rejiaun Administrativa Espesiál Oe-kuse Ambenu (RAEOA), ohin Segunda (21/11), iha Tuku 9:00 kontinua nadodon ba Atauro hodi partisipa iha Festivál Muzíka no Kultura ne’ebé sei hala’o iha loron 21-24 fulan Novembru.
Tuir partisipante João de Jesus, informa objetivu ohin sira halo viajen Dili ba Atauro ne’e atu ba tuir festivál ne’ebé realiza husi Prezidente Republika, José Ramos Horta.
“Ohin ami viajen husi Dili ba Atauro ne’e ami sae ró gratuita de’it, tanba ró ne’e ita-nia Prezidente Republika no Governu mak selu”, nia hateten ba Timor Post online iha Portu Dili, Segunda (21/11).
Nia dehan, ohin sira simu kartaun mak foin bele halo viajen, ne’ebé tiket mós laiha ba gratuita de’it ho ró Succes.
Nia hatutan, ba partisipa festivál iha Atauro mós tenke uza kartaun no balun simu voucher husi ró Succes, no balun lista naran iha ró nian de’it.
“Tanba ne’e hanesan Timoroan sente kontente no orgullu tanba iha festivál ne’e rasik partisipa husi ita-nia Embaixadór sira, jornalista sira husi Indonézia ka jornalista internasionál nian no Munisípiu 12 no RAEOA”, nia hateten.
Nia dehan, kona-ba sira-nia hahán, fatin no buat hotu Estadu mak responsabiliza.
Tuir Observasaun Timor Post nota iha terenu katak partisipante sira atu viajen ne’e sira lori sasán maka hanesan Roupa, balun lori motor, bisikleta, tenda kemping, karreta no ba partisipante sira lori bisikleta ne’e ba to’o ne’ebá halo atividade Desportu.
Partisipante festivál sira nadodon ba Atauro hahú husi Kinta-feira, no sira sei fila iha loron 25 Fulan Novembru tinan ida ne’e.
Portantu Atauro oan sira preparadu atu assegura Festivál Kultura no Múzika ne’ebé sei realiza entre loron 21-24 fulan Novembru.
Sira ho kontente simu ema atus ba atus ne’ebé tama no sai sira-nia Munisípiu no harame eventu importante ida ne’e.
Ekipa husi Governu, Prezidensiá Repúblika no parseiru sira, hamutuk ho Atauru oan sira, halo hela esforsu másimu, hodi realiza eventu ne’e.
1,504 total views, 6 views today
