DILI, (timorpost.com)— Iha semana kotuk, Autoridade Nasionál Petróleo (ANP) foti asaun suspende produtu Lubrifikante ne’ebé deskonfia falsu fa’an iha merkadoria ho Marka Shell 4T AX5 15W–40 ho númeru Batch 11871564100809DEC21 no Shell Advance 4T AX7 10W-40 ho númeru Batch 11816640100825AUG21 40 ne’ebé prodús no importa husi Indonézia, tanba deskonfia produtu falsu maka agora daudauk sirkula hela iha merkadu.
Liuhosi Komunikadu Imprensa iha sítiu anpm.tl, publika ohin (19/03) ne’ebé Timor Post asesu katak, hafoin prosesu investigasaun tomak, ANP determina katak autentisidade husi produtu Shell Advance 4TAX515W–40 no Shell Advance 4TAX710W ne’e sei la garante atu fó benefísiu maibé sei fó fali risku ba konsumidór sira.
Hare ba konkluzaun ne’e maka ANP foti ona desizaun atu sita ka hasai lai produtu Shell Advance 4TAX515W–40 no Shell Advance 4TAX710W ho detallu númeru batch ne’ebé mensiona iha vendedór sira-nia fatin. Medida ne’e presiza tebes atu foti ho objetivu bele proteje konsumidór sira no bele mantein integridade merkadu óleu lubrifikante nian.
ANP tau importánsia ba kualidade no seguransa atu kumpri ba regulamentu institusaun nian no mós esforsu atu halakon produtu falsu sira ho dalan ne’ebé própriu ka dalan ne’ebé loos no justu.
ANP sujere ba konsumidór sira atu hili óleu ne’ebé hetan ona lisensa no iha sertifikadu.
ANP sei kontinua halo monitorizasaun ba situasaun ne’e no sei kolabora ho vendedór sira atu elimina produtu óleu ho detallu ne’ebé mensiona iha leten ne’ebé maka sei sirkula hela iha merkadu, hodi garante merkadu ne’ebé justu no transparante ligadu ho marka óleu lubrifikante nian. ANP sei fahe nafatin informasaun atualizada relasiona ho desizaun refere.(*)
2,433 total views, 21 views today
Bele hare Video Seluk :
Subscribe to Timorpost
