DILI, (timorpost.com)— Bankada Parlamentár FRETILIN husu Governu kria uluk laboratóriu integradu ida hodi nune’e bele hala’o teste ba produtu importadu sira molok fa’an iha merkadu.
“Tenke teste uluk lai, fóti lai ninia sampel, hodi ba koko uluk lai importasaun ba ai-han iha valór nutrisaun ne’e di’ak ka lae, iha ninia aimoruk sira garantia nia bele to’o loron no fulan hira, para ema bele konsumu, agora ita laiha laboratóriu ne’e mak problema, buat ne’e tama tiha mai to’o tiha ba merkadu mak foin haruka fali AIFAESA sira, tékniku atu tuun ba kontrola iha merkadu”, hatete deputadu bankada FRETILIN, Antoninho Doutel Sarmento, iha Parlamentu Nasionál, Tersa, (12/03).
Nia hatutan, tenke iha laboratóriu ne’ebé integradu hodi nune’e hala’o teste ba produtu importadu sira ne’e liuliu ida ne’ebé kontamina ho kímiku hanesan formalin antes fa’an iha merkadu ka loja sira.
“Ita-nia sasán sira ne’e prejudika tebes ba merkadu, bainhira ita lori sasán sira ne’e mai iha merkadu laiha kontrolu ida didi’ak, afeta ba saúde komunidade ninian, la’os de’it moras mais bele lori mate, tanba ita-nia rain ne’e ema konsumu importasaun barak demais liu, see ita hatene katak na’an sira ne’e ninia inzesaun sira inzeta aimoruk formalin barak liu iha laran”, esplika nia.
Nia hatutan, hahán importadu sira ne’e, maioria husi nasaun Brazil, Xina, Vietnam no Indonézia, kuandu importa mai Timor-Leste ne’e asegura ho aimoruk formalin.
“Ita-nia país ninia problema mak laiha laboratóriu integradu ida ka laboratóriu nasionál ida para atu garantia importasaun sira, liuliu ai-han sira husi rai-liur sira mai ita-nia rain”, nia dehan.
Tanba ne’e, Timor-Leste tenke iha laboratóriu nasionál ne’ebé bele hala’o teste ba produtu importadu sira.
Antes ne’e mós, Deputadu bankada FRETILIN ne’e kestiona Timor-Leste seidauk iha laboratóriu ba teste produtu kímiku no físiku importadu, no laboratóriu Ministériu Saúde no Ministériu Agrikultura no Peska, liuliu veterinaria ne’e hala’o teste ba de’it mikrobiolójiku.
“Daudaun ne’e ita iha de’it laboratórium rua iha rai-laran, mak laboratóriu nasionál saúde no veterinaria nian, maibé ho barámetru ki’ik, laboratórium rua ne’e so bele halo teste de’it ba mikrobiolójika, maibé kímiku ho físiku labele”, hateten Doutel liuhosi intervensaun iha reuniaun plenária PN, Tersa, (05/03).
Laboratóriu-rua ne’e so bele halo de’it teste ba mikrobiolójika, maibé kímiku ho físiku labele, tanba ne’e hotu-hotu akompaña iha inísiu tinan 2023 mosu deskonfia iha mina ho marka simpony ne’ebé prejudika ba saúde ema-nian. Nune’e mós foos marka vitória ne’ebé hetan denúnsiu katak iha manipulasaun no AIFAESA fóti medida hodi husu konsumidór sira atu evita konsumu foos refere. Maibé husi rezultadu teste ne’ebé hala’o iha nasaun viziñu Indonézia liuliu iha laboratórium Badan Pengawasan Obat dan Makanan (BPOM) Kupang, rezultadu hatudu negativu.
Nia hatutan, presiza investe iha instituisaun sira hanesan AIFAESA,IP no Inspesaun Kualidade Timor-Leste (IKTL) liuliu laboratóriu ba teste produtu importadu sira.(*)
2,565 total views, 3 views today
Bele hare Video Seluk :
Subscribe to Timorpost
