DILI (timorpost.com) – Servisu Apoiu ba Sosiedade Sivil no Auditoria Sosial (SASCAS) iha Gabinete Primeiru Ministru nia okos inaugura bee moos ho sistema gravitasaun iha suku Manelima, postu administrativu Laklubar, munisípiu Manatutu.
Timor Post asesu informasaun ne’e liuhosi pajina SASCAS katak, iha loron Sesta feira (26/05), diretór ezekutivu SASCAS-PM halo inaugurasaun bee moos ho sistema gravitasaun iha suku Manelima (Aldeias Futumanuk, Lafulau no Lakeno), projetu implementa husi ONG CUNTDTL ne’ebé mak hetan apoiu finanseiru husi SASCAS-PM iha mandatu VIII Governu Konstitusionál.
Enkuantu, sistema konstrusaun ne’ebé halo ho distánsia 6 km no halo ona tanke Intake/Akaptassun 1, tanke rezervatóriu 1 no torneira 3 sei falta torneira 20.
Liuhusi diskursu xefe suku Manelima, Jorge Soares, hatete, bee moos ne’ebé SASCAS fó apoia sei fó benefísiu ba komunidade uma kain 163, maibé daudauk ne’e foin maka halo torneira 3 sei falta 20 tanba ne’e komunidade sira sei preokupa ba asuntu ne’e.
Aleinde ne’e, Diretór ONG CUNTDTL, Albertino de Araújo Asa, hatete nia parte agradese ba VIII Governu Konstitusionál nia mandatu ne’ebé liuhusi SASCAS fó ona apoia ba bee moos ho sistema gravitasaun, maibé daudauk ne’e sei falta torneira 20 mak seidauk instala, tanba ne’e nia parte husu ba SASCAS atu kontinua tau nafatin konsiderasaun ba asuntu ne’e.
Hatán ba asuntu ne’e, Diretór Ezekutivu SASCAS-PM, Edvin D. Soares Noronha, hatete, torneira 20 ne’ebé sei falta governu bele troka, maibé sei iha nia kontinuasaun tanba ne’e iha fulan Jullu tinan ida ne’e SASCAS liuhusi nia parseiru ONG CUNTDTL sei tau nafatin konsiderasaun no SASCAS promete sei aumenta torneira 20 sa’e ba 22.
Aleinde ne’e, Edvin D. Soares Noronha komenta, SASCAS haree família balun hahú hamnasa, tanba labele ba dook ona kuru bee, maibé balun ne’ebé seidauk asesu besik bele kuru uluk iha bee mós ne’ebé instala ona no tempu besik SASCAS sei kontinua fó apoia atu lori haksolok besik liu ba komunidade.
Totál benefisiáriu ne’ebé asesu ba bee moos hamutuk uma kain 163 no agora sira ne’ebé hetan ona bee moos uma kain 25 restu sei propoin ba orsamentu SASCAS-PM iha planu tinan 2023 nia.
2,034 total views, 6 views today
