Dili (timorpost.com) — Tais hanesan identidade kulturál Timor-Leste nian, tanba ne’e iha loron 14 Fulan Dezembru tinan ne’e, Timor-Leste sei komemora loron nasionál Tais ba dahuluk.
Komemorasaun loron tais ne’e sei organiza konjuntu hosi komité Nasionál Kulturál Material Timor-Leste (KOMNAS PKI TL) hamutuk ho Pro-Reitoria Asuntu Estudantíl Universidade Timor-Leste ho tema “Ha’u-nia tais, Ha’u-nia identidade” lori Komunidade hadomi Tais.
Selebrasaun loron espesiál patrimóniu kulturál no immaterial Tais ne’e hetan ona rekoñesimentu internasionál husi The United Nations Educational, Scientific and Cultural Organization (UNESCO) iha loron 14 Dezembru 2021, nu’udar “Patrimóniu Kulturál Immaterial iha lista Salva guarda Urjente”, Prezidente Komité Patrimóniu Kulturál immaterial, Manuel Ximenes Mith, dehan iha Sentru Konvensaun Dili (CCD), Kaikoli, Segunda(12/12).
Tais hanesan identidade tradisionál Timor-Leste nian ne’ebé konsidera hanesan eransa Kultura husi bei-ala sira, no nia ezisténsia transmitidu husi jerasaun to’o ohin loron, ne’ebé iha nia valor Kultura no istória rasik ba Povu Timor-Leste nia moris.
“Selebrasaun dahuluk ba loron nasionál Tais tinan ida ne’e, sei envolve soru-na’in husi Munisípiu 14, Grupu moradores, Estudante Universitáriu no Komunidade iha Dili laran”, nia hateten.
Sei iha mós atividade seluk hanesan feira Tais, aprezentasaun traje tradisionál, dansa no múzika tradisionál, poezia, semináriu, konversa múzika, kompetisaun pintura, atividade artístika no karakter Kulturál.
“Tais hanesan elementu ne’ebé importante no inerente iha serimónia tradisionál komunidade ida-idak nian iha Territóriu Nasionál”, nia haktuir.
Uzu Tais iha signifikadu ne’ebé kle’an no importante tebes ba timoroan sira-nia vida, hahú husi moris to’o fali mate. No Timoroan uza Tais ba serimónia kulturál no prátika sosiál, hanesan lia-mate no lia-moris, barlake, feto-san no umane, simu bainaka no reprezenta mós identidade kulturál no grupu étniku”, nia tenik.
Rejistrasaun ne’e loke ona dalan ba alokasaun ho Montante 265,895 USD husi Fundus Patrimóniu Kulturál Imateriál ba implementasaun planu salva guarda ba Tais.
Governu Timor-Leste no parseiru dezenvolvimentu mós sei finansia inisiativa ida ne’e atu hasa’e koñesimentu públiku nian kona-ba Tais, motiva foin-sa’e sira atu iha interese ba tais no aprende tékniku kona-ba soru-tais, aumenta oportunidade rendimentu ba soru na’in sira, atrai turista sira-nia interese kona-ba Tais nu’udar Timor-Leste nia kultura, no mós hametin liután soru-tais sira-nia ligasaun.
2,879 total views, 3 views today
Bele hare Video Seluk :
Subscribe to Timorpost
