BAUKAU, (timorpost.com)– Servisu Munisipál Agrikultura Peska, Pekuária no Floresta (SMAPPF) Baukau prepara fini haree variedade nakroma total tonelada 20 resin atu distribui ba agrikultór sira iha area poténsia ne’ebé mak identifikadu.
Informasaun nee hato’o husi diretor SMAPPF Baukau Moises Lobato ba Timor Post, kuarta (13/12) iha Baukau.
Nia afirma, daudaun nee distribui ona fini ne’e ba Postu Venilale ho Vemasse, maibe sei falta mak Baukau Vila, Baguia, Laga no Kelikai sei distibui iha tempu besik ne’e. Kada postu sei hetan hare fini tuir area potensiál, maibé fini barak sei distribui ba agrikultór husi postu administrazivu Baukau Vila tanba natar komesa husi Suku Gariuai, Samalari, Buibau to’o Seisál natar barak.
“Fini haree nee sei distribui tuir area potensiál ne’ebé estensionista sira identifika ona maibé barak liu ita sei tau iha postu Baukau Vila tanba ita hatene parte mota Uatu-ua area Gariuai too iha Seisál natar barak no ita sei tau (distribui) fini hare tonelada lima,” dehan Moisés.
Diretór nee rekoñese katak fini hare tonelada 20 resin sei la sufisiente ba agrikultór sira atu kuda iha natar iha époka primeiru nee tanba tuir planu nasionál kada hectare sei fo fini hare 20 kg, no fini nee produs kedas iha Munisípiu Baukau ho kualidade hamutuk tonelada 40.
Tuir observasaun jornalista nian nota katak la iha armazein, obrigadu funsionáriu servisu agrikultura munisipál rai fini iha salaun edifísiu servisu nune’e difikulta funsionáriu sira nia movimentu.(#)
813 total views, 6 views today
Bele hare Video Seluk :
Subscribe to Timorpost
