DILI (Timor Post) – Governu Daualuk Konstitusionál liuhusi Ministériu Koordenadór ba Asuntu Ekonómiku (MKAE) hamutuk ho Servisu Rejistasaun no Verifikasaun Emprezariál Institutu Públiku (SERVE, IP), Sesta (26/08), realiza sesaun Konsultasaun Publika kona-ba Adezaun Timor-Leste (TL), ba Organizasaun Mundiál Komérsiu (OMK), nu’udar membru ho direitu tomak ba OMK.
“Teknikamente adezaun Timor-Leste ba OMK, ne’ebé hala’o husi ekipa tékniku sira iha progresu hanesan pillar Polítika, Seguransa no Sósiu-Kultura, ne’e la’o ho di’ak ho ekonomia mak kompleksu. No Timor-Leste hodi sai membru ba OMK”, diskursu Koordenadora Gabinete Ministériu Koordenadór Asuntu Ekonómiku (MKAE), Guida Araújo, hafoin partisipa serimónia kona-ba konsultasaun públika adezaun Timor-Leste ba Organizasaun Mundiál Komérsiu (OMK), iha Salaun Delta Nova, Fomentu, Sesta (26/08).
Nia dehan, hanesan hot-hotu hatene katak konferénsia nivel altu kona-ba adezaun Timor-Leste, atu sai membru ho direitu tomak ba Organizasaun Mundiál Komérsiu (OMK), ne’ebé realiza iha loron 12 fulan Juñu tinan 2022, ko’alia mós kona-ba grupu traballu Timor-Leste nian ne’ebé hetan apresiasaun husi entidade Estadu sira ba esforsu no servisu sira ne’ebé hala’o ho dedikasaun no responsabilidade tebes.
Nune’e hatuur husi programa prioridade balun durante konferénsia nivel altu ne’ebé apoiu husi grupu traballu Timor-Leste nian ne’ebé aumenta nivel konsultasaun ba parte internal no external.
“Tanba ne’e maka ohin ita kontinua rona nafatin hanoin produtivu husi ita-nia funsionáriu sira no mós uza oportunidade ne’e hodi hato’o ba ita boot sira rezultadu di’ak Timor-Leste nian alkansa ona nivel prosesu ne’e”, nia hateten.
Konsultasaun ne’e mós nu’udar parte integrada hodi hametin memória institusionál hodi kontinua tranzmite servisu ida ne’ebé hala’o ona husi grupu traballu iha instituisaun sira ne’ebé SERVE mós hola parte hotu.
Iha fatin hanesan Diretór Ezekutivu Servisu Rejistasaun no Verifikasaun Emprezáriu, Institutu Publika (SERVE, IP), Florencio Sanses, hatete importánsia adezaun Repúblika Demokrátika de Timor-Leste ba OMK ne’e presiza funsionáriu SERVE sira hotu-hotu hatene hodi tau pensamentu hamutuk ba adezaun ne’e.
“Primeiru ita tenke manan iha area polítika tanba nasaun ki’ik ida hanesan Timor-Leste atu sai membru OMK ne’e priviléjiu boot ida ba Povu Timor, Segundu SERVE,IP nia funsionáriu sira tenke hatene kona-ba área ekonómika. Tanba Timor-Leste nia populasaun ho 1,3% ne’ebé tuir observasaun nasaun membru OMK Timor labele prodús produtu rasik”, nia hateten.
Nia afirma benefísiu Timor-Leste sai membru organizasaun mundiál komérsiu OMK, primeiru mundu tomak bele hatene katak Timor mós bele hola parte iha organizasaun ida ne’ebé akumula nasaun dezenvolvidu barak.
“Tanba ne’e, dezafiu ne’ebé ita hasoru maka setór privadu sira ne’ebé sai autór ba iha atividade ekonómika komérsiu rai laran seidauk preparadu pelumenus ita kria mekanizmu balun hodi provoka sira atu nune’e sira bele kria netik buat ruma. No labele dependénsia liubá iha Orsamentu Jerál Estadu (OJE)”, nia hakotu.
2,103 total views, 3 views today
Bele hare Video Seluk :
Subscribe to Timorpost
