DILI (Timor Post) – Sekretáriu Estadu Asuntu Kombatente Libertasaun Nasionál, Julio da Conceição “Loro-Mesak”, dehan família husi Francisco Borja da Costa, deside ba halot Saudozu nia ruin iha moris fatin Postu Administrativu Fatuberliu, Munisípiu Manufahi.
“Sim, saudozu nia ruin foin lalais família ba ke’e hetan ona ija área Largo Lesidere ninian, no lori ona bá munisípiu Manufahi saudozu nia moris fatin,” Nia hateten iha servisu fatin, Kaikoli, Sesta (26/08).
Nia reforsa, antes ne’e Governu ba buka no ke’e ona, maibé la hetan, tanba ne’e família deside ba halo tuir tiha Kultura hafoin mai ke’e fali konsege hetan ona.
“Sim, ruin ne’e saudozu nia duni tanba ema hotu hatene saudozu mak hakoi duni iha ne’ebá, maibé karik ema ruma la fiar bele halo fali teste DNA, kuandu família aseita, ita bele halo teste,” deklara nia.
Governante ne’e dehan tan, saudozu Francisco Borja, nia restu mortais sei la ba hakoi iha Jardín dos Herois Metinaru, maibé sei ba halot iha nia moris fatin.
“La ba Jardín dos Herois, tanba família la konkorda, maibé família prepara ona monumentu ida iha Fatuberliu, munisípiu Manufahi, ne’ebé sei lori ba halot iha ne’ebá,” Julio dehan.
Nia subliña, daudaun ne’e saudozu nia restu mortais lori ona bá Fatuberliu, munisípiu Manufahi hodi prepara ba halot.
805 total views, 3 views today
