DILI (Timor Post)—Estrada Diresaun Postu Administrativu Baguia, Munisípiu Baukau liga ba suku Haiconi, Ossu Una no Suku Afaloicai aat total, difikulta movimentu transporte públiku.
Xefe Suku Afaloicai Germano João Baptista, hatete durante udan loron hirak liu ba ne’e mak akontese dezastre naturais hodi estraga estrada diresaun hosi postu administrativu Baguia ba suku Haiconi, Ossu Una no Suku Afaloicai aat total. Agora risku ne’ebé grave liu mak mota Bazarwai, Irameli iha area suku Haiconi, Lakoidana iha area suku Ossu Una nian no mota Samalari iha suku Afaloicai, difikuldade ne’e mak komunidade sira susar asesu ba transporte.
“Udan durante semana ida nia laran ne’e mak hodi hamosu dezastre naturais barabarak iha Postu Administrativu Baguia ne’e hodi estraga estrada diresaun Postu Baguia ba suku Haiconi, Ossu Una no Suku Afaloicai aat total difikulta tebes movimentansaun transporte públiku”, nia hateten ba Timor Post liuhosi Telefone, Kuarta (05/07).
Nia dehan, ho estrada ne’ebé aat, movimentansaun transporte públiku laiha ona, nesesidade báziku ne’ebé iha Kioske sira, suku Afaloicai sasán folin sa’e ona.
“Agora ita haree iha ha’u-nia suku Afaloicai, sasán nesesidade báziku hanesan foos, mina supermi no sasán sira seluk tan komesan folin sa’e ona tanba karreta labele lori ona sasán mai iha ne’e, entaun Kioske sira mós hasa’e sasán folin”, Germano hateten.
Nia informa, postu administrativu Baguia karreta tama duni, maibé ho tempu ida agora ne’e karreta susar atu ba tanba estrada aat.
Durante udan ne’e, la’ós estraga estrada de’it, maibé estraga mós komunidade nia uma, sasán uma laran bee lori hotu, toos no natar mota estraga hotu.
“Iha suku Afaloicai ne’e komunidade sira nia uma hetan estragu ne’e mak aldeia Buibela uma haat mak hetan estragu, aldeia Okilari, uma lima, aldeia Wee mata uma ida no Lena uma rua mak estragu”, nia informa.
Nia salienta, uma hira ne’ebé temi ona ne’e, tanba udan iha tempu kalan, ne’e mak estraga uma sasán uma laran bee lori ba hotu inklui foos bee lori hotu.
“Agora iha suku Afaloicai kona-ba produtu lokál tinan ida ne’e laiha benefísiu, tanba udan beibeik estraga totalmente no tinan ida ne’e komunidade sira bele susar uitoan”, nia tenik.
Parte hosi Ministériu Agrikultura Peska liuhosi Diresaun sira iha munisípiu no postu administrativu to’o ohin loron seidauk ba haree problema sira ne’ebé komunidade sira enfrenta.
“Ha’u hanesan Xefe Suku rekomenda ba Governu tun mai iha baze hodi haree dezastre ne’ebé komunidade sira enfrenta no mós rezolve kona-ba estrada ne’ebé ami suku tolu ne’e enfrenta”, nia hakotu.
Xefe suku haktuir, semana rua ona ne’e, komunidade sira atu ba Baukau tenke la’o ain kuaze oras resin foin to’o iha Baguia Vila hodi sa’e karreta.
Tanba ne’e dala ida tan ha’u husu urjentemente ba Governu liuliu Ministériu Obras Públiku (MOP) liuhosi Institutu Jestaun Ekipamentu (IGE Sigla Portugés) tun mai iha Postu Baguia hodi normaliza estrada ligasaun postu Baguia mai suku Haiconi, Ossu Una no Suku Afaloicai ne’ebé aat total ne’e.
Ikus nia dehan, atu nune’e karreta bele lori sasán ba kioske sira iha suku tolu ne’e no komunidade sira mós bele transfere sira-nia produtu ba fa’an iha postu Baguia no munisípiu Baukau.
2,792 total views, 6 views today
Bele hare Video Seluk :
Subscribe to Timorpost
