DILI (timorpost.com)—Hahú tinan 2021 to’o 2023, Ministériu Administrasaun Estatál (MAE) liuhosi Programa Nasionál Dezenvolvimentu Suku (PNDS) abandona Uma Naroman Ba Povu (UNP) tolu iha Aldeia Baboru, Suku Wakala, Postu Administrativu Baguia, Munisípiu Baukau.
“Uma Naroma ba Povu ne’e faze primeiru konstrui iha tinan 2021 to’o agora seidauk finaliza, ne’e ba benefisiáriu na’in tolu iha Baboru,” pesoál ne’e lakohi fó sai identidade, ba Timor Post, Sesta-Feira (22/09/2023).
Fontes anónimu ne’e informa, benefisiáriu na’in tolu mak, Inan faluk Ana Maria, Adão da Costa no Domingos da Costa.
Faluk Ana Maria hela de’it iha uma Baraka ne’ebé la merese umanu atu hamon aan. Maibé Faluk Ana Maria idade 80 ho pasiénsia hela hodi hein konstrusaun final.
“Avó Ana Maria hela iha Baraka ki’ik oan ida besik família, ha’u triste tanba realidade ita haree sira nia kondisaun moris ne’e susar liuliu inan faluk Ana Maria ne’e idade 80. Agora hela de’it iha fatin ida-ne’ebé ami haree la merese duni para atu hela,” tenik fontes anónimu ne’e.
Pesoál ne’ebé lakohi fó sai identidade ne’e informa, konstrusaun ne’e paradu impaktu hosi estrada aat ne’e benefisiáriu rekoñese. Agora tempu bai loron joven sira servisu voluntáriu hadi’a estrada, to’o agora PNDS la tula ona material hodi kontinua projetu refere.
Alende ne’e, simente kuaze barak fatuk ona no mós batako kuaze nakfera hotu.
Ho ida ne’e, sente triste tanba UKL faze dahuluk iha munisípiu balun finaliza ona no kontinua faze daruak mós finaliza ona. Iha Baboru Baukau seidauk finaliza ne’e UKL faze dahuluk nian.
Husu ba Nonu governu liuliu Ministériu Administrasaun Estatál (MAE) bele kontinua obra hosi Governu anterior atu bele finaliza hodi nune’e kbiit la’ek nain tolu ne’e bele sente Timor Leste nia ukun aan.
Entretantu, atividade implementasaun uma kbiit la’ek iha Timor-Leste hamutuk 1.254 ba iha suku 424.
2,284 total views, 9 views today
Bele hare Video Seluk :
Subscribe to Timorpost
