DILI (timorpost.com) — Primeiru Ministru (PM), Taur Matan Ruak, hala’o enkontru ho Prezidente Repúblika (PR), José Ramos Horta, ko’alia kona-ba prepativu Orsamentu Jerál Estadu (OJE) 2023, iha Palásiu Prezidensiál, Bairru-Pité, Kinta (13/10).
“Preparativu kona-ba orsamentu 2023, agora ne’e iha faze audisaun públika, portantu iha fulan Novembru loron 01 ami ba ona iha Parlamentu, hodi bele halo diskusaun,” PM Taur dehan hafoin enkontru ho Xefe Estadu.
PM Taur subliña, iha fulan Novembru ou fim de Novembru em-prinsípiu Dezembru tenke haruka mai Prezidente Repúblika, nune’e iha loron 01 Janeiru tenke tama em vigór.
Enkuantu maski ema hotu-hotu haree kona-ba proposta OJE iha tinan kotuk ezekusaun ki’ik, Tuir PM Taur katak, defende ezekusaun ida ne’ebé di’ak.
“Ha’u-nia prinsipiu ne’e, ha’u defende ezekusaun ida ne’ebé di’ak la’ós ezekusaun de’it, ezekusaun ne’e bele gasta tuun gasta sa’e, depois ezekuta hotu loos ona,” PM Taur relata.
Governante ne’e esplika, hotu-hotu sei lembra uluk sei iha Prezidente Repúblika, krítika iha Parlamentu no ba Governu anterior dehan, imi husu osan hira mak imi gasta, nunka husu gasta ba saida, husi ne’e mak ezijensia ida agora tenke halo ida ne’e hanesan gasta ba saida, karik gasta di’ak ne’e importante, maibé ida ne’ebé la gasta hotu ba fali kofre estadu.
Relasiona ho ida ne’e, kada Kuarta-kuarta Konsellu Ministru sempre prova hela de’it planu projetu sira ne’e, maibé tuir ema hotu-hotu nia haree kona-ba ninia planu projetu sira ne’e seidauk realiza.
“Ha’u hanoin iha regra balu ita labele sees tenke la’o, husi ne’e ajuda ita para gasta osan di’ak. Tanba sei ita hakarak halai-halai de’it dala-ruma ita prezudika sira ne’ebé implementa, tanba ita-nia prosesu administrasaun, prosesu legál ne’e husu para ita tenke tuir,” Taur afirma.
Governante ne’e haktuir, ida fali maka estudu sira tenke di’ak, kuandu husi parte sira deside hodi avansa ho projetu ruma, ida ne’e mak importante.
“Tanba ne’e mak ha’u hanoin ita halo buat ne’ebé ita bele ita la halo buat ne’ebé ita hakarak, ita-nia hakarak ne’e atu halo barak, mais sei ita kbiit naton hodi halo uitoan, ne’e ita tenke halo ida ne’e, buat ne’ebé ita bele, la’ós ida ne’ebé ita-nia hakarak,” Taur hakotu.
4,368 total views, 3 views today
Bele hare Video Seluk :