DILI—Inspetór Jerál AIFAESA, Herneto Monteiro, hatete, sampel mina sona Symphoni, sei lori ba halo teste iha laboratóriu POM, Kupaun, Indonézia.
“Ami foti mona mina ho marka Symphoni nia sampel, hodi haruka ba teste iha laboratóriu POM Kupaun Indonézia, tanba ita nia kapasidade laboratóriu iha ne’e labele deteta kualidade mina, entaun ita tenke haruka ba POM Kupaun, ami halo ona kontaktu ho POM Kupaun, sira prontu simu produtu ida ne’e,” nia dehan ba Timor Post iha nia knar fatin Matadouru, Kinta (16/03).
Nia hatete, prosesu haruka sampél ba laboratóriu POM Kupaun, Indonézia, ekipa AIFAESA,I.P sei haruka iha tempu badak.
Hafoin halo teste, nia rezultadu ne’e parte laboratóriu POM Kupaun, sei haruka fila fali mai AIFAESA, I,P hodi fó sai ba públiku hodi hatene. No bainhira rezultadu hosi teste ne’e hatudu ema moras kauza hosi mina ne’e maka sei hapara kedas sirkulasaun mina ne’e iha merkadu.
Entretantu nia parte orienta ona ekipa tékniku AIFAESA ho Ministériu Saúde no Ministériu Turizmu Komérsiu Indústria atu halo intervensaun iha loja no supermerkadu sira iha Dili laran hodi hapara provizóriu sirkulasaun mina Symphoni iha merkadu, hafoin iha kuarta (15/3), akontese komunidade balun afeta moras hafoin konsumu mina sona ne’e.
Iha pasiente hamutuk na’in tolu baixa iha klínika Bairru Formoza, maibé daudaun ne’e maioria fila hotu ona ba sira nia hela fatin.
Entretantu Vítima Rogério Pires, konta, iha tersa (07/03) oras meiudia, nia ho família ba kompras mina sona Symphoni iha loja Hadomi, Bairru Pité.
Hafoin lori mina too iha uma, hanesan baibain lori mina refere fila modo, inklui sona ho ikan balun, hodi família han meiudia nian. Nune’e mós nune’e mós iha tempu kalan familia kontinua uza mina refere fila modo kalan nian.
No iha tempu dadeer ferik-oan lori mina kontinua sona dose hodi matabixu, hahú hosi atividade matabixu, too iha oras meudia familia sente kedas sintomas kabun bubu, laran sa’e, arrota, oin halai, kosar no isin kolen no sente muta.
“Ami hanoin konsumu ikan mak ikan lanu ami, too kabun bubu no sente sintomas oioin, maibé liu tiha loron rua, ami la han ikan, maibé ami moras aumenta tan de’it, kuaze semana ida ami sente forsa laiha, iha uma laran ami família hosi primu ho nia kaben ho oan no ha’u ho ha’u nia kaben ho oan sente hotu sintoma hanesan, ami deskonfia ona katak ne’e kauza hosi konsumu mina,” nia konta.
Relasiona ho kazu ne’e, vítima husu ba Governu atu halo kontrolu másimu ba produtu importasaun tanba iha produtu barak mak, na’in ba loja sira troka tiha nia embalajen foun maski produtu refere expire ona maibé kontinua fan filafali.
Entretantu traballadór ne’ebé servisu iha Loja hadomi, lakohi sita nia identidade haktuir, mina Symphoni kuaze fa’an iha Loza Hadomi iha Dili laran, produtu ne’e la’ós foin maka fa’an maibé fa’an nanis ona ho presu 6 USD.
“Ami iha ne’e atende fan, maibé ami la hatene ninia ne’e kualidade ka lae, tanba iha embalajen ne’ebá seidauk expire ida, durante ne’e konsumidór barak mak sosa produtu ne’e, maibé ema la kestiona foin primeira véz ida ne’e akontese,” nia dehan,” nia hatete.
Nia dehan, kona-ba mina ne’e atu sirkula ou lae ne’e depende ba loja na’in, nia hanesan traballadór nia papél mak fa’an no ajuda hit sasán.
708 total views, 3 views today
