Manatuto (timorpost.com) – Xefe Suku Batara, Postu Administrativu Laklubar, Munisípiu Manatuto, Tomas Pinto, husu komunidade kontribui ba limpeza jerál iha Suku laran.
Nia hatete, orientasaun ne’ebé iha suku laran komunidade ida-idak presiza halo tuir bainhira Orientasaun ne’e tu’un, maibé kuandu la kumpre regras mak programa ruma hosi Governu, sira sei la hetan tantu feto ka mane.
“Hau nu’udar lider suku atu kuida komunidade sira hodi hado’ok a’an hosi moras, ba moris di’ak, maibé husu sira atu mai servisu hamutuk, sira lakohi mai, ha’u la obriga, husik oportunidade Governu mak haketak sira,” dehan Xefe Suku Batara iha Postu Laklubar, Sesta (14/10).
Nia dehan, komunidade sira liuliu iha suku Batara kompostu hosi aldeia lima (5), hanesan, Balulin, Are-Ain, Fatuha, Wer-Ulun, maibé bolu sira atu mai servisu sira lakohi.
“Komunidade hosi suku Batara, ha’u ukun kuaze tinan sanulu-resin-tolu (13), signifika iha konfiansa ruma ba ha’u, maibé husu sira mai servisu lakohi atu koopera, entaun ha’u fó presaun ka sansaun ba sira mak programa PNDS ruma sira la hetan”, nia afirma.
Iha parte seluk nu’udar koordenador suku Batara, Carlos Soares, hatete hanesan Xefe juventude, labele hola desizaun, maibé presiza mós ho desizaun hosi juventude ka inan-aman sira, maibé husu sira atu mai servisu sira lakoi.
“Ita lakoi atu koopera malu ho ita-nia liurai suku Batara, oinsá mak ita-nia suku ne’e bele la’o ba oin, tanba kontribuisaun suku ba nasaun ne’e liu-hosi ita hotu nia unidade,” tenik nia.
Nia dehan, presaun no sansaun, saida mak xefe suku ko’alia, ida ne’e mak sei sai opsaun prinsipál ba sira, katak programa Governu nian, sira ne’ebé viola no kontra regulamentu labele hetan tulun hosi Governo.
“Ha’u rekomenda ba juventude hosi suku Batara, atu ita koopera malu nafatin, hodi servisu hamutuk ho ita-nia lider suku, hodi lori ita-nia suku ka aldeia sira ba oin”, nia hakotu.
817 total views, 3 views today
