Dili (timorpost.com) – Lixu hanesan problema jerál ne’ebé ema barak sempre preokupa, bainhira iha tempu udan, iha Sidade Dili liuliu área tasi-tolu sempre hamosu risku ba inundasaun kauza husi soe lixu.
“Ita hotu hatene katak Dili hanesan kapitál ba Timor-Leste, ida ne’e dezde iha okupasaun kolonializmu, Indonézia nia tempu kedan to’o agora, kuaze ema barak mak konsentra hamutuk iha Dili, hodi buka servisu no halo servisu hodi bele hetan rendimentu atu sustenta ba nesesidade família”, Estudante husi UNITAL, Agostinho Oqui, hateten ba Timor Post online iha Terminal Tasi-Tolu, Domingu (06/11).
Estudante ne’e afirma, hanesan sidadaun tenke iha devér no moral atu asegura ambiente ne’ebé moos, hodi bele fó saúde ne’ebé di’ak ba ema hotu.
Tanba ne’e, nia dehan soe Lixu arbiru sai problema iha sidade Dili, liuliu área terminal Tasi-tolu, ema laiha konxiénsia hodi soe lixu iha nia fatin ne’e maka Governu prepara tiha ona.
Nia informa, soe lixu arbiru sai ameasa ba vida umanu no estraga beleza sidade nian, bainhira tempu udan halo komunidade iha area tasi-tolu ladún hakmatek.
Governu halo polítika oin-oin hodi bele rezolve problema lixu ne’ebé sosiedade enfrenta, maibé sidadaun ida-idak maka laiha konxiénsia atu asegura ambiente ne’ebé moos no saudavél.
Ikus nia rekomenda ba Governu liuhusi Autoridade Munisípiu Dili, atu esforsu hamutuk ho autoridade lokál sira hodi tun ba suku sira atu halo sensibilizasaun ba komunidade kona-ba impaktu soe lixu arbiru hodi halo prevensaun ba moras sira.
Nune’e mós Autoridade lokál sira hotu, atu haree kestaun lixu ne’ebé soe arbiru iha fatin-fatin, no valeta kuak, liuliu iha área Terminal Tasi-Tolu nakonu ho masa mamuk no plastiku.
2,313 total views, 9 views today
