ATAÚRU(timorpost.com)—Komunidade Suku Vila Maumeta, Munisípiu Ataúru, Nidia Cabecas, preokupa eletrisidade mate oras 8 no mós liña internet la’o lentu kada loron hodi difikulta sira halo atividade moris lor-loron nian.
“Ami iha ne’e preokupa liu mak eletrisidade mate lakan no mós liña internet la’o lentu kada loron difikulta tebes ba ami bainhira presiza telefone ba família ruma rede la di’ak nune’e mós problema ida ami hasoru maka estrada hosi Aldeia ba Suku no Suku ba Munisípiu kondisaun aat”, Komunidade Suku Vila Maumeta, Nidia Cabecas, informa ba Timor Post iha Vila Maumeta, Sesta (09/02).
Nia hatete komunidade barak iha Aldeia balun mós seidauk asesu ba liña eletrisidade, ho situasaun obrigada sira tenke uza solar panel hodi fó naroman ba sira nia oan sira hodi estuda matéria eskola nian.
“Eletrisidade ami enxe pulsa, maibé kada loron ahi mate entaun estraga ami nia sasán eletrónika sira aat hotu no mós difikulta ami negosiante sira bain sona dose no tunu paun uza listrik, maibé listrik mate hela de’it, tanba ne’e ami husu ba Prezidente Autoridade Administrativa Ataúru foun ne’e durante ne’e nia mandatu tenke rezolve ona problema sira ne’e”, nia husu.
Relasiona ho preokupasaun Prezidente Autoridade Administrasaun Ataúru, Mateus Belo, kompromete, iha nia mandatu durante tinan lima servisu hamutuk ho EDTL hodi rezolve ba preokupasaun ne’ebé komunidade hasoru liuliu eletrisidade ne’ebé mate lakan ne’e estraga komunidade sira nia sasán eletrónika.
“Tanba ne’e maka iha ha’u nia mandatu durante tinan lima nia laran, ha’u esforsu servisu hamutuk ho parte hotu-hotu hodi hadi’a dezenvolvimentu iha munisípiu Ataúru la’o di’ak inklui hadi’a setór turizmu hodi atrai visitor sira mai vizita fatin turizmu iha Ataúru”, nia promete.
2,052 total views, 3 views today
Bele hare Video Seluk :
Subscribe to Timorpost
