DILI (timorpost.com) – Primeiru Ministru (PM), Taur Matan Ruak, husu instituisaun Bee Timor-Leste Empreza Públiku (BTL-EP), atu dada bee moos ba komunidade ne’ebé oras ne’e seidauk asesu iha territóriu laran.
“Primeiru Ministru husu ami servisu operasaun manutensaun no sistema sira boot liuliu hanesan iha Dili para bele garantia bee ba ita-nia komunidade sira”, dehan Prezidente BTL-EP, Carlos Peloi dos Reis, iha Palásiu Governu, Tersa (04/09).
Nia dehan, tuir Xefe Governu nia observasaun BTL halo duni esforsu, maibé presiza aumenta tan esforsu sira ne’e para bele aselera servisu.
Nia reforsa, primeiru Ministru mós husu Bee Timor-Leste atu aselera lalais projetu fornesimentu Bee moos ba komunidade sira iha Dili no mós Munisípiu sira hotu.
“Iha area investimentu mós Sua-Exelénsia hanoin katak ita presiza aselera ba projetu foun sira, iha area postu nian, rurál nian no mós iha Dili no Munisípiu sira ne’ebé apoiu husi ita-nia Parseiru sira,” dehan nia.
Primeiru Ministru, mós orienta Bee Timor-Leste Empreza Públiku atu halo koordenasaun di’ak ho parseiru dezenvolvimentu sira hodi aselera lalais projetu sira ne’ebé iha ona akordu.
Entretantu iha sorumutu ho xefe Governu ne’e mós, Prezidente Bee Timor-Leste Empreza Públiku, Carlos Peloi dos Reis, relata kona-ba servisu Bee Timor Leste nian.
Nune’e nia dehan, simu mós orientasaun husi Primeiru Ministru para bele aselera liután servisu Bee no saneamentu ba komunidade sira iha territoriu tomak, la’ós de’it iha area rurál no liuliu fokus ba oinsá mellora sistema Bee moos ba komunidade sira iha Kapitál Timor-Leste.
1,627 total views, 9 views today
Bele hare Video Seluk :
Subscribe to Timorpost
