DILI (timorpost.com) —Primeiru Ministru (PM), Taur Matan Ruak, hatete semana oin sei realiza festival múzika no Kultura iha Munisípiu Atauro.
Nia hatete, Festivál múzika no kultura iha Ataúru 2022 nian, lidera husi Gabinete Primeiru Ministru (PM) ho gabinete Prezidente Repúblika (PR).
“Enkontru semanál ho Prezidente Repúblika, ko’alia uitoan kona-ba Prezidente nia inisiativa ba atividade kulturál iha Ataúru,” nia hateten hafoin enkontru semanál ho Prezidente Repúblika (PR), José Ramos Horta, iha Palásiu Prezidensiál, Bairru-Pité, Kinta (13/10).
Nia dehan, kona-ba pontu ne’ebé koloka ba festivál ou atividade kultura iha Ataúru, gabinete husi Primeiru Ministru ho Prezidente Repúblika mak lidera.
“Ita iha komisaun Organizadór ida ne’ebé daudaun ne’e haree hela ida ne’e, nune’e mós parseria entre gabinete Prezidente Repúblika nian ho ha’u-nia gabinete ne’ebé lidera hela ida ne’e,” PM Taur relata.
Enkuantu iha enkontru ho Xefe Estadu, konversa ne’ebé PM Taur iha ho Prezidente Repúblika, hatete muda fali iha loron 20 ba oin, inisialmente marka 14 Novembru, maibé 14 ne’e pratikamente 01 to’o 20 itall ne’e Governu tomak sei iha Parlamentu Nasionál.
Nune’e agradese loos alterasaun ida ne’e, hodi serteza Prezidente Repúblika, hodi hakarak tebes, enkuantu mais Governu ativamemte partisipa iha inisiativa sira ne’e, di’ak, tanba ajuda mós movimentu husi sidadaun Timor.
“Buat ne’ebé ohin ha’u rona husi Prezidente Repúblika katak, iha loron 4 ou 5 hanesan ne’e, ne’e di’ak,” PM Taur hakotu.
Tuir informasaun ne’ebé Timor Post Online asesu, sei iha eventu Festivál múzika no kultura iha Atauru 2022, iha loron 21 to’o 24 Novembru tinan ne’e, ho atividade hanesan Múzika Instrumentál Tradisionál, Konkursu, Poezia ho Akústika, Pintura, Filme Dokumentáriu, Ai-Knanoik, Desfile Trajes Tradisionál, Soru-Tais, Ai-Han Tradisionál no Internasionál.
Alende ne’e mós iha Feira ba Livru no artezanatu, atividade iha Tasi-laran, kompetisaun Korrida Ró no Nani-Tasi. Atividade iha foho ou rai-maran hanesan ne’e, kompetisaun halai sa’e foho, kompetisaun korrida bisikleta BMX, adventure, kuda-ai mangrove.
5,204 total views, 3 views today
Bele hare Video Seluk :
Subscribe to Timorpost
