DILI, (timorpost.com)— Komandu Polísia Nasionál Timor-Leste (PNTL) munisípiu Lautém, Superintendente Polísia João da Costa, informa katak hahú husi fulan-Janéiru to’o Marsu tinan ida ne’e, PNTL Latém foin mak rezista kazu asidente no sidadaun ida mate fatin tanba kondisaun lanu, maibé situasaun hotu la’o ho di’ak.
“Husi inísiu Janéiru to’o ohin loron komandu PNTL munisípiu Lautém mós rejista asidente maibé iha semana ida liubá ne’e mak asidente fatal ida, motorizada husi Kom ba Tutuala mak asidente, tanba lanu, motorizada baku fila rai-naruk mak akontese mate fatin”, Komandante ne’e informa ba Timor Post, Kinta, (28/03).
Nia dehan, iha duni, problema ki’ikoan sira ne’ebé sempre mosu, maibé ho prezensa polísia no autoridade lokál, inklui entidade hotu ne’ebé iha munisípiu Lautém servisu hamutuk ho polísia nafatin garante seguransa para ema hotu-hotu bele la’o livre no bele hala’o nia atividade loron-loron nian, iha ambiente pás nia-laran.
Aleinde ne’e, iha Domingu liubá akomtese tan insidente ida Tasi, Lafaek tata ita-nia sidadaun ida husi Atauro mak servisu projeitu iha ne’eba, depois nia halimar iha tasi laran mak Lafaek tata no rezulta mate, maibé komunidade, Bombeiru no Proteisaun sivíl sira husi Lautém salva maibé matebian nia isin la kompletu tiha ona.
“Mate isin ita entrega ona ba família hodi halo funébre, maibé daudauk ne’e situasaun ein jerál la’o di’ak no hakmatek nafatin”, dehan nia.
Komandu PNTL munisípiu Lautém mós nafatin hala’o atividade pasa revista ba utilizadór transporte públiku no provadu nu’udar atividade rutina PNTL nian.
“Ami sempre halo iha munisípiu Lautém, tentu karreta lokál iha Lautém rasik no mós transporte sira ne’ebé tama sai iha munisípiu Lautém, ami sempre halo pasa revista”, nia informa.
Objetivu husi pasa revista ne’e mak atu ema hotu bele hala’o viajem ba mai karik tenke kontrola, disiplina, tenke la’o kuidadu, atu ne’e labele hetan asidente no insidente. Karik, balun la lori karta kondisaun ka kontra lei kóndigu estrada, konserteja polísia hetan tenke prosesu tuir lei.(*)
2,028 total views, 3 views today
Bele hare Video Seluk :
Subscribe to Timorpost
