BAUKAU, (timorpost.com)–Komandu Polísia Nasionál Timor-Leste (PNTL) liu husi Unidade Espesiál Polísia (UEP) seksaun EOD (Explosive Ordinance Disposal) hamutuk ho komandante eskuadra Laga, tersa (5/12) harahun materiál funu nian iha area Binagua Postu administrativu Laga.
“Intensaun ita halo destruisaun materiál funu nian atu evita ninia risku boot ba ita nia komunidade. Tanba ne’e ami nafatin halo sosializasaun hodi fahe pamfletu ba komunidade nune’e hatene materiál funu nian, bainhira komunidade hetan informa ba Autoridade Lokál no Ofisiál Polísia Suku (OPS) atu ita halo destruisaun tanba nia risku ba komunidade boot,” dehan Inspetór Asisténsia Polísia, Duarte Ximenes Belo “Soru” ba Timor Post hafoin remata halo destruisaun.
Nia esplika, atividade destruisaun nee hala’o tanba antes nee nia arte hato’o karta pedidu ba Komandu Polisia Munisípiu no kontinua enkamina Komandu Jerál PNTL hodi orienta UEP seksaun EOD iha nasionál. Nune’e konsege halo destruisaun ba materiál funu nian hanesan granada no morteiru tanba rai de’it bele rahun hodi fó risku ba ema vida. Material esplozivu funu nian ne’e komunidade hetan iha suku Saelari no Laga Vila iha tinan ida ne’e.
Iha fatin hanesan Komandante Seksaun EOD, Sarjentu Xefe Polisia Eustáquio de Jesus Ximenes esplika, materiál esplozivu funu nian hanesan granada no morteiru halo destruisaun nee mai husi segunda Guerra Mundiál tanba ne’e tenke halo destruisaun. Alende granada no morteiru iha mós kartús maibé ekipa sei lori ba nasionál foin halo destruisaun tanba material hirak ne’e ho destruisaun maneira ne’ebé la hanesan.
Tuir informasaun material funu nian ne’ebé halo destruisaun kompostu husi granada modelu ai fuan kabuar hamutuk 16, projetil artillaria (8) no munisaun (bala musan) hamutuk 500 resin maibé sei halo destruisaun iha nasionál.(#)
3,882 total views, 3 views today
Bele hare Video Seluk :
Subscribe to Timorpost
