Dili(timorpost.com)—Vontante 11.337 hosi aldeia 8 iha Suku Madohi sei hili fali sira nia xefe Suku foun, 2024 ate 2028, hodi kontribui ba prosesu dezenvolvimentu sira iha Suku no aldeia nia laran.
Kestaun ida ne’e atuál Xefe Suku Madohi, ne’ebé re-kandidata aan, Bernardino de Cristo Ferreira, informa ba Timor Post iha Sentru Votasaun Sede Suku Madohi, Sábadu (27/04).
“Ohin Aldeia ualu, hanesan Aldeia Naroman, Aldeia Rosario, Anin Fuik, Terra Santa Beta Leste, Beto Oeste, Beto Tasi, no Aldeia 7 Dezembru, monta hotu sentru votasaun, ne’ebé totál votante Suku Madohi 11.337 ne’e sei fó sira nia votu ba kandidatu na’in-9, inklui Feto ida, ida maka tenke sai manan na’in hodi sai Xefe Suku Madohi foun”, Xefe Suku Madohi, Bernardino, informa.
Sentru Votasaun Suku Madohi ne’e, hahú kedas iha tuku 9:00, tanba votante sira iha ne’e mai dezde tuku 7:00 forma ona iha Sentru Votasaun, entaun ekipa sira halo prosesu lalais ikus mai realiza duni.
“Ohin iha sentru votasaun ida ne’e populasaun sira sei hili fali sira nia lideransa foun órgaun suku nian, para hodi ezerse sira nia direitu no hili sefe suku foun, Xefe Aldeia foun no Delegadu sira atu bele servi sira ho di’ak”, Bernardino hateten .
Iha fatin hanesan Kandidatu ba Xefe Suku, Alberto da Silva Gomes, hato’o ninia kandidatu katak, tanba iha interese hakarak Suku Madohi nia povu tenke moris ho pás, estabilidade no atinje dezenvolvimentu ida ne’ebé sustentavel.
“Bainhira manan iha eleisaun ida ne’e, primeiru povu tenke moris iha pás, estabilidade, hadi’a estrada hamutuk ho Igreja, povu hotu tenke atinje dezenvolvimentu ida ne’ebé mak sustentavel iha bairru laran”, Alberto, hateten.
Tuir Observasaun Timor Post iha terrenu katak, Populasaun iha suku Madohi hahú votasaun iha Sentru Votasaun Suku Madohi iha tuku 9:00 da dersán no hetan seguransa husi Polisia Nasionál Timor-Leste PNTL. Iha ne’e marka Prezensa husi CNE, STAE, MAE Observadór Nasionál.
1,671 total views, 27 views today
Bele hare Video Seluk :
Subscribe to Timorpost
