(Jornalista Jaime Pires/Editora Suzana Cardoso)
DILI (Timor Post) — Tanba loke bola Gulling ilegál iha Bairru Tasi-Tolu, Aldeia Terra-Santa, Suku Madohi, Postu Administrativu Don Aleixo maka ekipa patroliamentu Polisia Nasionál Timor-Leste (PNTL) hosi Munisípiu Dili detein suspeitu na’in haat.
“Iha loron Domingu (10/10), maizu menus tuku 10:30 OTL ekipa investigasaun no kriminál husi Munisípiu Dili halo operasaun ba iha fatin bola Gulling sira. No konsege deteta iha Aldeia Terra-Santa, konfirma jogu ne’ebé mak hala’o iha ne’ebá laiha lisensa. Ekipa investigasaun foti kedas medida hodi kaptura suspeitu na’in haat.”
Haktuir Komandante Polisia Munisípiu Dili, Superintendente Xefe Henrique da Costa ba Timor Post iha nia knaar fatin.
Superintendente Xefe Henrique hatutan, daudaun ne’e suspeitu na’in haat ho inisiál; JP, MS, FMD no RDS iha hela sela detensaun Komandu Munisípiu Dili hodi kompleta oras 72, hafoin aprezenta ba iha ministériu públiku.
Tuir Komandante ne’e nia esplikasaun katak, hosi fatin kapturasaun ba suspeitu na’in haat ne’e, Polisia prende ona evidénsia sira mak hanesan; osan, bola gulling ho nia meza.
“Depois ita halo kapturasaun, suspeitu sira tenta fó subornu ba membru Polisia ho montante osan UD$100. Maibé membru sira kaptura kedas no lori ona suspeitu hirak ne’e mai iha sela hodi halo detensaun ,” esplika Superintendente Xefe Henrique.
Too notísia ne’e hatún kazu ne’e sei iha hela prosesu investigasaun hodi aprezenta ba iha ministériu públiku. (Lee Notísia Seluk Iha Jornál Timor Post no asesu mós Televizaun Timor Post iha youtube timor post)
792 total views, 3 views today
Bele hare Video Seluk :