Dili (Timor Post)— Ministériu Edukasaun Juventude no Desportu (MEJD) servisu hamutuk ho Sekretária Estadu Igualdade no Inkluzaun (SEII) realiza programa Sensibilizasaun Igualdade Bazeia ba Jéneru no Inkluzaun ba dirijenti sira, jestór, Professores no Autoridade lokál.
“Ita hotu hatene katak violénsia doméstika ou Igualdade bazeia ba jéneru sai kazu ida ne’ebé oferese dezafiu bo’ot mai Governu hodi buka dalan atu rezolve, tanba ne’e MEJD iha polítika ida liu husi programa sensibilizasaun hamutuk ho SEII nafatin implementa programa ne’e “, Ministru Edukasaun Juventude no Desportu (MEJD), Armindo Maia hatete hafoin remata Programa Sensibilizasaun iha otél Timor, Segunda (27/06).
Armindo dehan, programa sensibilizasaun ida ne’e sai hanesan alvu hodi muda ema nia pensamentu hodi redús ba krime violénsia doméstika no violénsia bazeia ba Igualdade jéneru ne’ebe mak nafatin buras iha sosiedade liu-liu ba feto sira.
Entretantu iha fatin hanesan, Sekretaria Estadu Igualdade no Inkluzaun (SEII), Maria Do Rosário Fatima Correia afirma, SEII ninia papél mak halo advokasia kona ba oinsá esforsu ba hamenus violasaun bazeia ba jéneru no violasaun doméstika ne’e nia prosesu oinsá.
“Problema Igualdade bazeia jéneru la’ós SEII mesak maibé ba liña Ministerial hotu, tanba ne’e ohin SEII ho MEJD servisu hamutuk hodi halo sensibilizasaun hodi haforsa planu estratéjiku Igualdade bazeia ba jéneru no Inkluzaun iha sistema ba futuru”
SEII sempre servisu hamutuk ho Ministériu Finansas no liña Ministerial hotu tau orsamentu hodi realiza programa sensibilizasaun Igualdade bazeia ba jéneru.
“Ita hatene katak iha planu anuál kada tinan liña Ministerial sira tau ona orsamentu $500 mil USD, hodi hala’o sensibilizasaun, ida ne’e importante tebes hodi hamenus violasaun doméstika no Igualdade jéneru nian”, Nia hatete.
Governu iha kometimentu tomak hodi luta ba iha Igualdade Bazeia ba jéneru, tanba ne’e ba futuru nafatin kometimentu tanba hot-hotu hatene markadór Jéneru iha ona sistema finansas ba futuru nian.
1,246 total views, 3 views today
Bele hare Video Seluk :