DILI (Timor Post) —Durante fulan Janeiru to’o mai ohin loron moras Infesaun Respiratóriu (IR), Estómagu no moras kulit númeru aas iha klínika Santu António Motaél.
“Ita hatene katak hahú hosi fulan Janeiru to’o mai ohin loron moras ne’ebé mak ami deteta ka rejistu númeru aas iha Klínika ne’e mak moras sira hanesan moras infesaun respiratóriu, Estómagu no moras kulit no tuir fali mak moras sira seluk”, dehan Diretora Klínika Motaél, Irman Inácia Mafalda Fatima, iha ninia knaar fatin, Tersa (20/07).
Diretora Klínika Motaél ne’e afirma liu tan katak, moras oin tolu ne’e iha mós moras oin seluk hanesan mear, maibé maioria ne’e ema boot.
“Moras sira ne’e mai ho grave uitoan, moras ne’ebé dominante mai iha ne’e problema respiratóriu no kondisaun mear mak barak. Depois tuir mai ne’e mak moras sira hanesan estómagu, ema barak mak sofre hodi mai halo tratamentu iha ne’e. Aleinde moras sira seluk”, diretora ne’e relata.
Nia salienta, ko’alia kona-ba problema kulit mosu hosi ema sira ho moras lepra hanesan iha 2021 klínika ne’e rejistu maizumenus ema na’in tolu, maibé moras ne’e difisil halo tratamentu.
“Kuandu la halo tratamentu ba ema ne’ebé lepra ho di’ak mak nia konsekuénsia ema ne’e bele sai defisiénsia liman ou ain”, nia tenik.
Klínika Motaél mós halo tratamentu ba inan isin rua sira no labarik sira bai iha vasinasaun nian. Aleinde ne’e mós simu pasiente hosi klínika sira seluk mai halo analiza laboratóriu no leno bebé iha kabun.(PJ12/PJ16)
887 total views, 3 views today
Bele hare Video Seluk :
Subscribe to Timorpost
