Dili(timorpost.com)—Ministru Edukasaun Juventude no Desportu (MEJD), Armindo Maia, dehan prosesu kona-ba bolsu méritu ne’e kontinua la’o no daudaun ne’e sei iha faze reklamasaun ninian.
“Bolsa méritu ne’e agora sei iha hela faze reklamasaun, maibé reklamasaun ne’ebé mak tama ona ne’e ladún barak, ne’ebé agora kontinua hein kuandu tama hotu ona mak sei halo verifikasaun ba reklamasaun sira ne’e”, dehan Armindo Maia, ba Timor Post iha Palásiu Governu, Kuarta (22/03).
Nia aumenta, tanba ne’e mak agora ministériu edukasaun kontinua hein hela ba sira ne’ebé mak hakarak hatama reklamasaun ne’e, nune’e iha semana ida ka semana rua mai tan ne’e sira bele halo ona verifikasaun kona-ba ida ne’e.
“Kona-ba dadus reklamante ne’ebé mak tama ne’e seidauk ne’ebé ita kontinua hein nafatin, kuandu to’o nia prazu ne’ebé mak ita determina ne’e, ita labele tuir sira”, nia esplika.
Nia dehan, iha klarifikasaun ne’ebé mak sira presiza kraik, estudante sira uluk hetan valor di’ak iha eskola, maibé la hetan bolsu méritu, akontese duni iha sira nonu ano no désimu segundu ano ne’e.
“Maibé ita boot sira hatene katak, ida ne’e bazeia de’it ba iha sira nia rezultadu ezame nasionál ninian, la’ós mai hosi eskola, ida ne’e mak iha problema uitoan, maibé buat hotu-hotu sei rezolve ho di’ak”, Armindo deklara.
Ministru ne’e aumenta, tanba ne’e agora sira nafatin hein no husu ba sira ne’ebé mak antes ne’e la satisfás no kritika maka’as ne’e hakarak hatama sira nia reklamasaun, tanba agora ne’e tempu ona atu sira bele hatama sira nia reklamasaun.
Nune’e kuandu tempu ba hatama reklamasaun ne’e semana ida ka rua kuandu remata ona, sira bele halo verifikasaun no iha reklamasaun ne’e mak balun hatudu loos duni sira nia parte sei forma ekipa ida hodi tun ba identifika no halo investigasaun nune’e bele haloos tiha.
3,849 total views, 9 views today
Bele hare Video Seluk :
Subscribe to Timorpost
