BABULO (Timor Post)—Xefe suku Babulo, postu administrativu Same Villa, munisípiu Manfufahi, Alice de Jesus Nunes, hateten implementasaun projeitu ba Uma Kbi’it Laek (UKL) iha suku Babulo konsege kansela bataku husi fornesedór sira tanba laiha kualidade.
“Progresu UKL la’o di’ak maibé ami autoridade suku mak halo intervensaun barak liu-liu ba bataku kuaze rihun 4 ne’ebé laiha kualidade, tanba ne’e ha’u kansela tiha”, dehan Alice liuhosi enkontru iha sede suku Babulo, postu administrative Same, sesta (06/08).
Nia dehan, kuaze halo intervensaun ba ekipa PNDS iha tereinu, fornesedor inklui halo mós intervensaun to’o kompañia relasiona ho batako rihun 4 resin ne’ebé hodi halo uma UKL ne’e.
“Antes implementa sira hatama batako mai maibé badaen sira la simu nune’e sira diskute malu ho ida ne’e ha’u tun diretamente hodi haree modelu batako ne’ebé la hanesan no agora ema hotu halo ho mákina la’ós ona ho manual”, nia dehan.
Neduni implementasaun UKL ne’e tenke utiliza batako ne’ebé rapidu no largura tenke hanesan, maibé liu ba kuaze rihun 4 resin la hanesan ne’e hodi kansela tiha labele utiliza no buka fali batako seluk.
“Hafoin ida ne’e ha’o halo kedas xamada ba ekipa PNDS suku no kompañia fornesedór no ami kestiona ida ne’e, tanba obra refere nain mak ami, neduni ami tenke ezije halo buat ne’ebé di’ak ba povu”, nia haktuir.
Tuir nia katak, ho implementasaun UKL ne’e estadu fó hela servisu boot ida mai autoridade suku ho postu no sira kontrola servisu ida ne’e liuliu ba iha kualidade implementasaun.
“Maske ami la’ós jestór ba UKL ne’e, maibé favour labele finji halo konstrusaun ne’ebé ho material ne’ebé la hatudu ninia rezultadu di’ak nune’e husu PNDS munisípiu ho postu atu haree buat ne’ebé la di’ak tenke fó hanoin ba malu”, nia rekomenda.
Molok hakotu nia tenik, maske prosesu konstrusaun atinji ona porsentu 50, maibé kontinua husu ba ekipa sira ne’ebé responsabiliza ba obra UKL ne’e tenke haree didi’ak to’o finaliza porsentu 100.(lcl)
1,796 total views, 3 views today
Bele hare Video Seluk :