BAUKAU (timorpost.com) — Estudante 17.867 iha munisípiu Baukau, Segunda (24/07), partisipa ezame segundu períodu hahú hosi nivel ensinu pre-primária to’o nivel sekundáriu partisipa ezame avaliasaun no ezame segundu períodu Segunda.
“Estudante ne’ebé partisipa ezame segundu períodu ita fahe ba parte rua, primeiru parte ensinu pre-eskolár ho primeiru siklu ita halo de’it ezame avaliasaun, maibé ensinu bázika terseiru siklu to’o sekundáriu tantu eskola katolik, komunidade no públiku tuir ezame segundu períodu durante loron neen, hahú Segunda to’o Sábadu”, Xefe Departamentu Ensinu Servisu Edukasaun Munisipál Baukau, Afonso dos Santos da Costa, ba Timor Post iha nia servisu fatin, Segunda (24/07).
Nia esplika, total estudante 17.867, kompostu hosi eskola públiku, hahú hosi ensinu pre-primária to’o sekundária iha 5.088 estudante, eskola katólika hahú hosi pre-primária to’o sekundária 1.’719 estudante no eskola komunidade hahú hosi ensinu pre-primária to’o sekundária iha 1.513.
Nia afirma, matéria ezame segundu períodu ba estudante ensinu bázika terseiru siklu no sekundária, tantu sekundária jerál no tékniku vokasionál bazeia ba matéria ne’ebé hanorin iha kada nivel eskola, ensinu sekundária jerál no tékniku vokasionál iha matéria sanulu resin tolu, ensinu bázika terseiru siklu.
Tuir informasaun ne’ebé iha ezame segundu períodu eskola hotu hala’o dala ida iha loron 24, maibé iha eskola neen iha Baukau Vila hanesan ensinu Bázika públiku terseiru siklu 01 no 03 ho mós ESSA Senior no Junior.
Eskola SACROJES Vila Nova, inklui ensinu bázika primeira no segundu siklu São Domingos Savio seidauk halo ezame tanba eskola hirak nee uza bainaka sira hodi deskansa bainhira partisipa serimónia ordenasaun Bispu foun.
“Eskola hirak ne’e posibilidade hala’o ezame segundu períodu iha loron Kuarta 26 to’o Tersa semana oin, tanba eskola hirak ne’e okupa hosi ita nia bainaka sira hosi munisípiu seluk iha serimónia ordenasaun Bispu foun Dioseze Baukau no eskola hirak ne’e Distinadu ba bainaka ka sarani sira hosi munisípiu seluk, tanba bazeia ba despaxu hosi ministra edukasaun”, Afonso dehan.
Tuir observasaun jornalista nian nota katak, eskola hirak ne’ebé mensiona iha leten daudaun ne’e hala’o limpeza jerál iha areadór eskola no forma meza ho kadeira iha sala laran.
1,760 total views, 3 views today
Bele hare Video Seluk :