DILI, (timorpost.com)— Embaixadór Japaun iha Timor-Leste, Titsuya Kimura, asina akordu ho Organizasaun Naun Governamentál (ONG) Hader hodi konstrui eskola Ensiñu Báziku Sentrál (EMS) iha postu administrativu Maubara, munisípiu Likisa.
Iha diskursu Embaixadór Japaun iha Timor-Leste, Titsuya Kimura, dehan, onra ida ba nia hodi realiza serimónia asinatura kontratu ba projetu foun GGP ba konstrusaun edifísiu eskola EBS Maubara.
“Hanesan, ha’u ko’alia ona iha fatin seluk no okaziaun barak, ha’u-nia ligasaun ho Timor-Leste hahú dezde tinan 2000, Ha’u iha Dili iha tinan 20 liubá, servisu iha eskritóriu ne’ebé reprezenta Japaun iha momentu ne’eba. Japaun apoia ona konstrusaun nasaun Timor-Leste liu ona tinan 20, antes restaurasaun independénsia”, Embaixadór Japaun iha Timor-Leste, Titsuya Kimura, informa iha nia rezidénsia, Sesta-feira, (16/02), Kampun Alor, hafoin asina akordu.
Nia aumenta, durante ne’e Japaun apoia ona projetu eskala ki’ik hamutuk 138 iha Timor-Leste, hodi solusiona nesesidade bázika umana iha Timor laran tomak, ne’ebé fó benefísiu direta ba komunidade. Programa ida-ne’e hanaran GGP, Asisténsia Finansiamentu Projetu Komunitária no Seguransa Umana, Finanseiramente, apoia konstrusaun edifísiu eskola, postu saúde, sistema abastesimentu bee-moos iha kada munisipiu, konstrusaun ba fasilidade edukasionál, no kompleta ona projetu liu 40 ba melloramentu sala de aula eskola, sala ba mestre, haris fatin no toba fatin ba estudante sira.
Aliende ida-ne’e, Japonés na’in-21 agora daudauk servisu iha Timor-Leste iha programa voluntáriu ba kooperasaun esteriór Japaun nian (JOCV), na’in-13 servisu hanesan Mestre no asistente manorin.
“Sira hanorin iha eskola primária, pre- sekundária no sekundária no universidade, voluntáriu hirak ne’e kontribui ba kualidade edukasaun hodi utiliza sira-nia abilidade espesiál iha edukasaun fíziku, saúde, no matemátika”, Embaixadór Japaun deklara.
Entaun konserteza, la’os de’it kualidade ba fasilidade edukasionál maibé mós kualidade hanorin iha fasilidade hirak ne’e mós importante tebes. Aliende kona-ba programa voluntáriu, Japaun mós fornese bolsu estudu ba mestre timoroan sira hodi aprende kona-ba edukasaun iha universidade sira iha Japaun.
“Ha’u hakarak reafirma ba imi hotu katak Japaun kontinua komprometidu hodi koopera iha parte infrastrutura no rekursu umanu iha setór edukasaun”, nia promete.
Tanba iha projetu konstrusaun edifisiu eskola tolu ba tinan fiskál ida-ne’e, iha serimónia ne’ebé hala’o iha Dezembru tinan kotuk no asina ona kontratu rua ba projetu eskola EBS Harekain iha munisípiu Kovalima no Eskola Sekundária Assisi iha munisipiu Manufahi, ohin kontratu foun ho ONG Hader.
“Ha’u mós hakarak husu ba autoridade lokál, no sira ne’ebé iha papėl ba operasionalizasaun no supervizaun ba fasilidade atu asume responsabilidade hodi tau-matan besik liután ba nia manutensaun, nune’e labarik sira bele uza ba tempu naruk. Ha’u mós hakarak husu ba parte hotu-hotu atu involve no apoiu esforsu ida-ne’e”, Nia tenik
Atu remata nia fó dezeja susesu ba projetu, hein katak edifísiu eskola foun sei sai símbolu amizade entre nasaun rua. Enkuantu orsamentu ne’ebé Japaun apoiu no kontratu ONG Hader atu konstrui eskola EBS Maubara ne’e ho montante rihun 72.992.00 USD, durasaun ba konstrusaun durante tinan ida.
Iha serimónia asina akordu ne’e, partisipa mós husi Prezidente Autoridade Munisípiu Likisá, Paulino Ribeiro, Diretór eskola EBS Maubara no alunu na’in lima inklui ho profesór balun.(*)
3,534 total views, 9 views today
Bele hare Video Seluk :