DILI (timorpost.com)—Nasaun Australia liuhosi Servisu Migrasaun autoriza ona Timoroan, atu bele utiliza pasaporte ne’ebé mate ka prazu liu ona, hodi bele asesu ba territóriu Australia ho estensaun karimbu.
Diretora Jerál Servisu Migrasaun, Inspetora Xefe Polisia, Adelaide da Rosa, hatete, Governu Timor-Leste liuhosi Ministériu Justisa (MJ) mak iha mekanizmu balun hodi bele aneksu ba pasaporte, maibé Migrasaun iha Australia la prezudika, karik iha nota verbal mai bele ba, kuandu laiha nota verbal hanoin la autoriza.
“Ita-nia lei númeru 23/2023 klaru, orienta ba Ministériu Justisa, estende uza karimbu ba iha pasaporte Timoroan sira nian to’o agora ita simu ona nota husi nasaun hitu, ne’ebé autoriza ita atu tama ho estensaun pasaporte,” nia informa ba jornalista sira iha knaar fatin Villa-Verde, Kinta (01/06).
Inspetora Polisia ne’e esplika, daudaun ne’e simu ona nota hosi nasaun hitu, ne’ebé kompostu hosi Australia Indonézia, Malázia, Estadu Unidus Amérika, Nova-Zelándia, Brazil no Japaun.
Luta Hamutuk Kritika
Diretór Ezekutivu Luta Hamutuk (LH), José Alves da Costa, kritika Governu liuhosi Ministériu Justisa (MJ), seidauk halo jestaun di’ak ba kaderneta pasaporte, tan ne’e mak prezudika ba nesesidade urjénsia sidadaun sira nian.
“Foin lalais afeta barak, problema ema ne’ebé maka moras liu 200, atu ba rai li’ur hodi halo tratamentu, maibé tanba pasaporte laiha, ida ne’e problema boot, iha fulan hirak ba kotuk, ita dehan ona katak, diretór jerál ne’e pecat tiha, tanba nia laiha kapasidade atu halo jestaun ba kestaun tékniku, kestaun tékniku la’ós polítiku,” nia informa ba Timor Post iha Sentru Nasionál Cehga (CNC) Balidi, Kinta (01/06).
Nia esplika, servisu ne’ebé tékniku nian, maibé Governu labele rezolve, nune’e afeta ba sidadaun sira nia moras hodi hala’o tratamentu ba nasaun seluk.
Maibé, iha mós solusaun seluk, labele tan de’it kaderneta laiha husik hein iha ne’ebá, tanba prosesu atu produs kaderneta pasaporte la’ós hanesan fotokopia baibain, tanba nia iha rekizitu, uza sistema global ninian, entaun presiza han tempu.
MJ tenke buka solusaun urjénsia ba kaderneta pasaporte, nune’e buka ema espesialista ka profisionál Saúde sira husi nasaun seluk mai halo tratamentu iha Timor-Leste.
Nia rekoñese problema pasaporte mate impede ema ninia nesesidade ne’ebé mak urjente liuliu sidadaun sira ne’ebé moras, sira ne’ebé hala’o estudu no sira ne’ebé mós hakarak ba servisu iha nasaun seluk.
Sosiedade Sivíl ne’e husu ba Governu atu aselera prosesu tomak, nune’e bele fasilita sidadaun sira ne’ebé hakarak viajen urjénsia ruma ba nasaun seluk, liuliu ba servisu, eskola no halo tratamentu ba saúde.
Antes ne’e, nasaun lima kompostu hosi Estadus Unidus Amérika (EUA), Brazil, Nova-Zelándia, Malázia no Indonézia, autoriza Timoroan atu utiliza karimbu prolongasaun ba dokumentu importante liuliu pasaporte mate ka liu ona prazu.
“Pasaporte ne’e estensaun no prolongasaun ba karimbu, pasaporte hosi nasaun Amérika konfirmandu bele uza ba Nova-Zelándia, Indonézia, Brazil no Malázia, kuaze país hirak ne’e aseita ona atu uza karimbu ne’e,” Ministru Justisa (MJ), Tiago Sarmento, hatete, iha Palasiu Governu.
Ministru ne’e dehan, daudaun ne’e Timoroan barak mak hala’o viajen ba nasaun Indonézia ho pasaporte mate, maibé uza karimbu estensaun nian.
“Ita hein tan semana ne’e, Australia no Singapura ho Korea sei simu tan konfirmasaun, karik hotu aseita hotu ona. Horisehik simu, Estadu Unidus Amérika ita bele uza karimbu prorrogasaun ba pasaporte”, nia esplika.
Governante ne’e esplika, karimbu prolongasaun ba pasaporte bele utiliza to’o loron 20 fulan Maiu tinan 2024. Ida ne’e sei laiha implikasaun ba sidadaun Timoroan ne’ebé hetan prolongasaun ba dokumentu pesoál.
Jornalista sira hakarak kontinua kona-ba tratamentu ba pasaporte foun, maibé Ministru Justisa la hatán. Alende ne’e mós husu obrigadu ba jornalista sira hodi kontinua hakat kedas ba karreta laran.
3,761 total views, 3 views today
Bele hare Video Seluk :
Subscribe to Timorpost
