DILI—Jerente Nasionál Kompañia ConocoPhillips iha Timor-Leste, José Lobato deklara, tuir predisaun ne’ebé mak kompañia iha katak mina matan Bayu-Undan ne’e sei maran iha tinan 2022.
“Tuir estimasaun hosi kompañia ba produsaun mina Bayu-Undan atu maran ne’e maizumenus akontese iha tinan 2022,” dehan Lobato ba jornalista sira iha Tibar, tersa (28/01).
Nia dehan, ida ne’e hanesan estimasaun deit no seidauk hatene klaru tanba hosi governu mós sei halo identifikasaun klaru kona-ba mina matan sira ne’ebé seidauk bele deskobre.
Portantu, kompañia sei buka dalan alternative seluk, oinsa bele hetan mina matan foun fali.
“Karik ita sei baku tan mina matan foun balun, maibé ne’e sei iha prosesu nia laran tanba iha tinan 2018 kompañia foin baku tan mina matan foun tolu iha Bayu-Undan no ida ne’e hanoin ultimu ona,” nia hakotu.
Enkuantu, antes ne’e tuir observasaun hosi Parlamentu nian relasiona ho projeksaun ne’ebe mak hatudu, katak produsaun ba kampu mina Bayu -Undan ho mina Kitan ne’ebe mak sei maran iha tempu besik.
Entretantu Deputada Brigida Antonia Correia hateten, Timor -Leste iha riku soin barak no durante ne’e governu liu husi Ministériu Petroleu no Rekursu Naturais haruka ona peskizador ne’ebe mak professional husi internasional hodi halo analiza ba riku soin sira ne’e.
“Ho konfiasa boot ba governu, liu-liu ministério kompetente,” katak nia.
Iha fatin hanesan, Vise Prezidente Parlamentu Nasional, Adriano Hugo da Costa hateten mina ne’e iha tempu ida sei maran.
“Tanba buat ida rekursu naturais ne’e naun renovavel no la’os esplora para sempre,” Aderito hateten.
Maibe, nia dehan, durante ne’e sira mós halo fiskalizasaun ba kampu Bayu –Undan, katak plataforma iha kampu ne’e tuir kontratu Production Sharing Contract ba kampu ne’ebé mak ninia produsaun sei tun, tanba ne’e Autoridade Nasionál do Petroliu no Minerais (ANPM) mós halo hela servisu ida ne’e.
“Agora daudauk tékniku sira komesa modifika ona plataforma Bayu -Undan hodi bele esplora tan posu sira ne’ebé mak besik” nia dehan. (jxy)
1,810 total views, 3 views today
Bele hare Video Seluk :