DILI, (timorpost.com)– Udan komesa tuku 15.00 loraik iha kapitál Dili rezulta populasaun iha Bekusi, postu administrativu Kristu Rei, munisípiu Dili, motorizada 10, sasán uma-laran, inklui dokumentu balun la konsege salva.
“Udan komesa tuku 15.00 otl, sasán sira ne’ebé hetan estragu mak hanesan, Jeleira, armáriu, motorizada 10 ne’ebé ha’u konta mak hoban hela iha bee”, hateten rezidente Bekusi Sentru, Adelina Freitas, ba Timor Post, via online, Sesta, (16/02).
Nia hatutan, inklui mós sasán seluk hanesan kulisaun no seluk tan. Bekusi kuandu udan boot oras-ida de’it mós bee komesa sa’e.
“Bee sa’e ne’e afeta husi mota ne’ebé ki’ik ka kloot, entaun volume bee maka’as no sai husi mota tama fali komunidade sira-nia uma,” haktuir nia.
Iha sorin seluk, rezidente Bekusi, Emanuel Lelan, haktuir iha viziñu balun liuliu estudante sira ne’e balun dokumentu la salva.
“Dokumentu balun konsege salva no alin estudante sira-nia dokumentu la aproveita. Maibé la konsege husu tuir tanba atrapalla ho situasaun ne’e, hodi salva sasán sira iha uma, ” salienta nia.
Tuir Emanuel katak, ninia dokumentu importante sira ne’e salva hotu, maibé iha sasán uma nian hanesan, zeleira no sasán dakur mak la konsege salva, tanba bee sa’e lalais ho velosidade maka’as.
Nune’e mós mota Bekusi Kraik komesa invade ona populasaun sira-nia uma, inklui sasán sira, no populasaun sira atrapalla hodi salva sasán sira ne’e maske iha udan laran.
Ministru Obras Públika, Samuel Marçal, tuun direta hodi observa mota inklui komunidade afetadu sira ne’e ninia hela fatin.(*)
2,453 total views, 21 views today
Bele hare Video Seluk :