DILI (Timorpost.com) – Governu hamrii uma mutin lima ba sobrevivente 12 Novembru iha Munisípiu tolu hanesan Dili, Vikeke no Manufahi.
“Hanesan juventude rezisténsia ne’ebé harii paz no estabilidade iha rai ida ne’e iha loron 12 Fulan Novembru tinan 1991, juventude no inan-aman barak mak mate, mate ho prinsípiu, mate ho objetivu, hakarak indepedensi”, hateten sobrevivente 12 Novembru, Tomas de Carvalho, Timor Post asesu iha media Públiku, Segunda (30/01).
Tuir nia, joven rezisténsia prontu luta ba nia nasaun, la’ós hanesan joven foin sa’e ka jerasaun foun mai ne’e, lakoi moris no valoriza ho nasaun nia liberdade, tanba saída, no hakarak ita ho ita mak funu fali, oho malu fali.
“Sente triste bainhira juventude milenial laiha hanoin ida hanesan jerasaun rezisténsia sira halo ba Timor-Leste, katak prontu hakilar, kontra nafatin ho desizaun invazór sira, ohin bele garanta ukun rasik-an,” nia aubliña.
Nia dehan, situasaun uluk no agora mais diferente liu, uluk ema mate tanba defende nia nasaun no nia povu, maibé situasaun ohin hasoru malu, halo funu fali hanesan ema inimigu sira halo torturasaun.
“Nasaun nia vida moris hanesan ne’e bei-beik sé los mak atu haree ita, mate saugati, tanba funu liu ona, uluk ema mate ho istória agora mate sein istória tanba laiha inimigu laiha polítika explorasaun”, nia hateten.
Tanba ne’e hanesan jerasaun rezisténsia, nu’udar sobrevivente husu nafatin ba jerasaun foin sa’e sira tenke hadomi malu ho sentidu liberdade, no orgullu teb-tebes ba Governu tanba bele rekoñese sira hodi halo uma mahon ne’e ba sira ho família sira atu hela.
“Ha’u sente triste bainhira hanoin hikas fali loron susar, loron terus, loron mata-wen, iha 12 Novembru tinan 1991, sente kontente mós ba VIII Governu tanba bele rekoñese ami ne’ebé terus no prontu mate ba ukun rasik-an.
Iha parte seluk Prezidente Komite 12 de Novembru, Grigorio Saldanha, hato’o mensajen badak ba Sobrevivente 12 Novembru, Tomas de Carvalho, nia parte agradese tebes ba VIII Governu Konstituisional ne’ebé maka liuhusi Servisu Apoiu Sosiedade Sivil no Auditória Sosiál — SASCAS-GPM servisu hamutuk ho Komité 12 Novembru hodi hari uma ida ba nia.
Tanba programa VIII Governu ne’ebé maka lideradu husi Primeiru-Ministru, Taur Matan Ruak, ne’ebé liuhusi SASCAS-GPM hodi kontinua tau matan nafatin ba ninia komunidade sira liuliu Sobrevivente 12 Novembru sira.
Gregorio Saldanha, hatete rezultadu Independênsia ne’e maka ema hotu tenke moris di’ak iha era ukun rasik-an ho kondisaun di’ak no dignu, tanba ne’e Governu nafatin hala’o nia kna’ar neneik maibé bebeik hodi atinji ba metas ukun rasik-an nian.
Uma 5 ne’ebé Servisu Apoiu Sosiedade Sivil no Auditória Sosiál — SASCAS-GPM fó apoio ba Komite 12 Novembru ba Sobrevivente 12 Novembru ne’e kada uma ida ho nia orsamentu 9.150.00 USD, Uma 3 halo iha Munisípiu Dili, uma 1 iha Munisípiu Manufahi, no ida seluk halo iha Munisípiu Vikeke.
1,769 total views, 3 views today
Bele hare Video Seluk :
Subscribe to Timorpost
