Díli (timorpost.com) – Mane isin metan, hatudu oin hamnasa midar bainhira haree Jornalista Timor Post hakbesik ba figura ida ne’ebé konversa hela ho ninia kolega padre sira, iha Igreja Nossa Senhora Imaculada da Conceição Katedrál, Dili.
Liu tiha minutu balun, Jornalista mós hakbesik daudaun ba Ermera-oan ne’e para bele dada lia ho nia kona-ba ninia esperiénsia midar-moruk ne’ebé nia hasoru hodi atinji ninia mehi hakarak sai padre, ne’ebé ikus mai realiza sai duni na’i lulik hanesan ohin loron hodi servi kreda Katólika liuhusi servi sarani sira.
Nia maka Padre Evaristo Fernandes da Costa Soares. Nia hakarak sai padre, tanba hakarak atu servi sarani Katólika to’o mate, maski hasoru situasaun oi-oin, maibé nafatin fiel iha vokasaun ne’ebé nia hili, hodi hatán ba Maromak nia bolu atu servi hodi haklaken evanjellu ba ema hotu to’o rohan.
“Ha’u hakarak sai bibi atan di’ak hodi servi kreda no servi Igreja Katólika hodi haklaken Maromak nia liafuan ba sarani tomak liuhusi Maromak nia ukun fuan sanulu tuir doutrina igreja nian,” Padre Evaristo konta bainhira dada lia ho Jornalista Timor Post, hafoin partisipa misa tinan foun nian, iha Igreja Nossa Senhora Imaculada da Conceição Katedrál, Domingu (01/01).
Moris iha Bobonaru, loron 16 fulan Agostu tinan 1974 ne’e, haktuir sai padre ne’e la fasil, tanba sei liuhusi prosesu naruk ida, sei liu etapa pur etapa, maibé tanba Maromak rasik fihir no hili ata oan ne’e, nune’e nia prontu atu sai bibi atan hodi servi Maromak nia povu to’o Maranatha.
“Ha’u kontente ho vida saserdotál ida ne’e, tanba promove Devosaun Divina Misericordia iha Timor-Leste, ne’ebé sarani barak maka envolve iha programa ne’e, para koñese diak liután Jesus Miserikordiozu hodi haksolok iha vida saserdotál, maibé husu sarani sira nia orasaun hodi akompaña ha’u nafatin fiel no hadomi nafatin ha’u nia vokasaun hanesan bibi atan di’ak ida hodi kontinua servi kreda to’o rohan,” Padre Evaristo haksolok.
Portantu, Padre Evaristo, ne’ebé ho naran estimadu Lito, ne’e hahú ninia estudu iha Primária Públiku Bobonaru, iha tinan 1982-1989, remata primária, nia deside fila fali ba ninia moris fatin iha postu administrative Atsabe, Munisípiu Ermera, hodi kontinua ninia estudu iuha Pre-sekundária Públiku, iha tinan 1988-1991, remata pre-sekundária mai fali iha Dili, hela ho família para bele kontinua iha eskola Sekundária Públiku 02 Matadouru, maibé la kleur iha eskola refere.
No mane isin metan ne’e, deside husik hela eskola refere hodi ba tuir fali teste eskola semináriu nian iha Saun Jose Balide, no nia pasa hodi kontinua sekundária iha semináriu refere, iha tinan 1992-1993, remata kontinua eskola semináriu nian to’o tinan 1994, kontinua formasaun ano propreodeótiku, remata kontinua ano espirituál iha semináriu Dare, iha tinan 1995 to’o remata.
Hafoin ne’e, nia kontinua fali ba tuir formasaun teolójia no filozofia nian iha Indonézia, maibé seidauk hotu, nia mai halo fali servisu pastorál iha Timor, iha tinan 1999 hodi partisipa iha votasaun referendum, hotu tiha iha tinan 2000, nia ba kontinua fali ninia formasaun to’o 2001.
Oan doben husi Celestino da Costa Soares (matebian) no Bendita Fernandes (matebian) ne’e, deside fila mai Timor hodi hala’o servisu pastorál iha Parókia Letefoho, iha tinan 2002, deside fila ba Indonesia hodi kontinua formasaun filozofia nivel mestradu nian iha Malang-Indonesia, remata iha tinan 2004. Depois nia fila fali mai Timor, iha tinan 2005 hodi halo preparasaun ba diákonu nian, iha Parókia Saun Jose Brites Likisá, kuaze fulan hitu, hotu tiha nia deside ba fali iha Dare kuaze fulan lima nia laran, hotu ba fali Munisípiu Ainaru, iha postu administrative Maubise to’o remata.
Hafoin ne’e, nia assume fali kargu hanesan Vise Ekonómiku iha Diocese Dili hodi prepara ba ordena nian, sai padre iha Igreja Nossa Senhora Imaculada da Conceição Katedrál, Dilim iha tinan 2006, hotu tiha ba fali halo misaun iha Parókia Ainaru, hanesan Padre Vigáriu, iha tinan 2006-2008 no kontinua hetan fali sai Amu Administradór iha parókia refere, iha tinan 2008-2011.
La para iha ne’e, Padre Evaristo kontinua hetan fiar husi Amu Bispu assume fali hanesan Amu Paróku iha Parókia Ainaru, iha tinan 2011-2014, no nafatin hetan konfiansa, assume fali kargu hanesan Diretór Caritas Diocese Dili nian, kuaze tinan ida nia laran.
Depois nia fila fali mai iha Dili, sai hanesan Padre Vigáriu iha Igreja Santu Antonio Motaél, iha tinan 2014-2018, remata tiha nia ba halo misaun iha Parókia Aileu, kuaze fulan hitu nia laran, hotu tiha nia deside fila mai fali Dili, assume fali kargu hanesan Padre Vise Kapelaun, iha Ospitál Komarka Bekora, kuaze fulan hitu nia laran.
Padre Lito relembra, bainhira nia sei ki’ik, mezmu ke nia hakarak sai padre, maibé ho tempu ne’ebé la’o lais liu, loron ba semana, semana ba fulan no fulan ba tinan, ninia mehi ne’e mós hahú lakon iha ninia hanoin, tanba durante nia eskola husi primeira to’o pre-sekundária, hela ho família.
Maibé, tanba Maromak nia tulun no tanba Maromak hadomi no fihir ona nia, ikus mai nia sai duni padre.
“Ida ne’e hanesan grasa no milagre husi Maromak fó mai hau, hau prontu atu hatán ba Nai nia bolu hodi sai bibi atan ida para bele servi kreda Katólika liuhusi haklaken Maromak nia liafuan ba sarani sira,” Padre Evaristo katak.
Portantu, buat hotu ne’ebé akontese iha ninia moris,ida ne’e tanba Maromak nia planu no Maromak maka deside “ita so prontu deit hodi hatán ba Nai nia bolu”, maski liu husi prosesu lubuk ida, maibé tanba suporta másimu husi inan-aman no família sira, husi parte material no espirituál, ikus mai hatán duni ba Maromak nia bolu, sai amu lulik hanesan ohin loron.
No nia rekoñese, durante eskola, nia ladún hasoru dezafiu ruma ne’ebé sériu, tanba ninia aman hanesan tropa iha tempu Portugés nian no mós hanesan professor, entaun buat hotu la’o di’ak, tanba inan-aman jere fundu ho di’ak liu husi esforsu ne’ebé sira iha, hodi bele sustenta ba nesesidade uma laran, inklui selu oan sira nia estudu, balun lisensiatura no mestradu mós balun, tanba hetan suporta másimu husi família.
Nia konsidera inan-aman maka sai fonte importante ba nia ho ninia maun-alin sira, tanba sira mai ho prinsípiu ida, katak maski mai husi família simples, maibé sira tau importánsia ba oan sira nia futuru naroman liuhusi asesu edukasaun, nune’e oan sira bele hetan susesu hotu no bele hetan moris ne’ebé diak mós.
“Ha’u agradese ba inan- aman no família tomak ninia apoiu, tantu iha parte material no espirituál nian, hahú husi inisiu to’o sai nai lulik hodi hatán ba Nai nia bolu, hodi servi kreda Katólika, liuhusi habelar Maromak nia liafuan ba ema hotu, halibur família ne’ebé nunka hakbesik ba Maromak, buka konsola no konvida família sira ne’e atu oinsa maka atu sira bele hakbesik ba Maromak,” nia hateten.
Entretantu, Padre Lito rasik iha maun-alin na’in-hitu, ninia bin boot sai madre, agora daudaun halo hela misionária iha nasaun España, enkuantu ninia maun na’in-rua maka mate ona, agora hela sira na’in-lima, sira hotu hetan susesu tantu iha setór edukasaun no mos iha kareira profisaun nian, balun servisu hanesan funsionáriu públiku.
2,071 total views, 6 views today
Bele hare Video Seluk :
Subscribe to Timorpost
