DILI (timorpost.com) – Ministru Negósiu Estranjeiru no Kooperasaun (MNEK), Bendito Freitas, Kinta (06/07), simu vizita Ministru Estadu Negósiu Estranjeiru Japaun, Takei Shunsuke. Vizita ida ne’e atu re-afirma governu Japaun nia kompromisu atu haforsa liután Kooperasaun Bilateral ho Timor-Leste (TL).
Bendito Freitas hatete, area barak mak Governu Japaun atu dezenvolve, tanba durante TL restaura estadu TL nu’udar estadu soberanu independénsia iha 2000 too mai ohin loron kontribuisaun ekonomia finanseira hosi Japaun mai TL signifikativu tebes.
“Prezensa Ministru estadu negósiu Estranjeiru nian mai Timor-Leste, atu reforsa tan objetivu kooperasaun nu’udar estadu, importante mós atu bele reafirma sira nia apoiu mai Timor-Leste ba dezenvolve setór infraestrutura liuliu Aeroportu iha TL,” Bendito informa hafoin remata simu vizita Ministru Estadu Negósiu Estranjeiru Japaun iha edifísiu MNEK, Kinta (06/07).
Nia dehan, Governu Japaun sei Kontinua fó apoiu mai Governu TL, entermu apoiu formasaun tékniku ba joven no estaziadu, inklui forsa Defeza, aumezmu tempu apoiu mós servisu media Telekomunikasaun sosiál, inklui konstrusaun setór infraestrutura, agrikultura, edukasaun saúde no parte seluk tan.
“Ita hatene katak, to’o agora Governu Japaun ninia apoiu mai TL ba dezenvolve hamutuk miloens 315 USD, alende ne’e apoiu mós ba asisténsia téknika pur volta miloens 128 USD, inklui imprestimu ba konstrusaun Aeroportu Komoro ho montante miloens 40 USD, apoiu hirak ne’e signifikativu tebes,” nia hato’o.
Tanba ne’e, nia haktuir, kompromisu hosi Governu Japaun forte tebes, dezde inisiu to’o mai agora, kompromisu ne’ebé iha sira mantein.
“Tanba ida ne’e mak, sira nia prezensa iha Timor-Leste, liuhosi vizita ne’e istóriku tebes, katak vizita ida ne’ebé mak ofisial, atu felisita ita nia Governu foun no reafirma sira nia apoiu kontinua solidariedade, manifesta ba ita nia dezenvolvimentu nu’udar povu mo nu’udar nasaun,” nia tenik.
Entretantu, Ministru Estadu Negósius Estranjeirus Japaun, Takei Shunsuke, hatete, vizita ida ne’e ho objetivu atu hametin liután relasaun bilateral entre Timor-Leste ho Japaun no atu hasa’e liután kooperasaun bilateral iha area hirak hanesan defeza no seguransa, dezenvolvimentu no ekonomia, dezenvolvimentu rekursu umanu, programa treinamentu estajiáriu tékniku, no mós kooperasaun seluk iha área rejionál no multilateral.
Durante vizita ne’e, Ministru Estadu Takei Shunsuke, hasoru malu uluk ho omólogu Ministru Negósius Estranjeirus no Kooperasaun, Bendito dos Santos Freitas, Prezidente RDTL, José Ramos Horta, Prezidente Parlamentu Nasionál, Maria Fernanda Lay, Primeiru-Ministru RDTL, Kay Rala Xanana Gusmão no ikus liu, Ministru Prezidénsia Konsellu Ministrus, Hermenegildo A.C. Pereira.
Enkuantu, tuir planu, Ministru Estadu Takei Shunsuke sei dezloka hikas hosi Timor-Leste ba Japaun iha loron Sesta ohin 07 Jullu 2023.
1,983 total views, 3 views today
Bele hare Video Seluk :
Subscribe to Timorpost
