DILI (timorpost.com) – Ekipa Konjunta Polisia Nasionál Timor-Leste (PNTL), kaptura ona suspeitu ho inisiál OCX, idade 22 ne’ebé sona Vítima Damazio, iha área ponte BJ. Habibie, iha Suku Bidau Santana, Postu Administrativu Kristu Rei, Munisípiu Dili.
Ekipa konjunta kompostu husi, Unidade FALINTIL, Servisu Nasionál Intelijensia Departamentu no Intvestigasaun Kriminal (DIK) no mós Departamentu Informasaun Polisia (DIP), kaptura ona suspeitu iha loron Tersa (10/01) tuku 09:00 iha otel moris fatin Suku Welaluhu, Postu Administrativu Fatuberliu, Munisípiu Manufahi.
Enkuantu, Suspeitu ho inisiál OCX sona vítima Damazio Correia Guterres ho idade 30 iha area Ponte BJ Habibie iha loron Sábadu kalan (07/01) iha oras tuku 09:45 iha ne’ebá PNTL detein hafoin mak Departamentu Investigasaun Kriminal Komandu Jerál PNTL rekolla informasaun husi servisu sekreta Dili ho sasin balun hodi buka tuir no konsege identifika paradeiru suspeitu ho inisiál OCX iha Munisípiu Manufahi.
Tan ne’e ekipa Departamentu Investigasaun Kriminál Komandu Jerál Polísia Nasionál Timor-Leste iha loron (10/01) dezloka kedas ba Munisípiu Manufahi hodi kaptura no foti suspeitu iha Suku Welaluhu, Postu Administrativu Fatuberliu, Munisípiu Manufahi.
Departamentu Investigasaun Kriminal Komandu Jerál PNTL mós, lori suspeitu ho inisiál OCX ne’ebé sona vítima Damazio Correia Guterres, husi Manufahi mai iha Dili halo identifikasaun kontinua entrega ba komandu PNTL Munisípiu atu halo prosesu investigasaun.
Nune’e mós, parte Departamentu Investigasaun Kriminal la autoriza ema ruma atu públika suspeitu OCX nia fotografia, tanba sei submete ba prosesu investigasaun.
Enkuantu tuir informasaun ne’ebé media online Timor Post asesu iha edifísiu Departamentu Investigasaun Kriminal katak, hafoin suspeitu OCX ekipa konjunta halo kapturasaun submete kedas ba iha prosesu identifikasaun, nune’e mós kontinua lori kedas suspeitu ba iha komandu PNTL Dili, hodi detein iha sela durante 72 oras, hodi halo investigasaun, depois sei aprezenta ba iha Ministériu Públiku (MP).
Antes ne’e, Komandante PNTL Munisípiu Dili, superintendente Xefe Polisia Natercia Eufrazia Soares Martins, hateten kazu akontese iha ponte Habibie, iha loron Sábadu kalan (07/01), iha oras tuku 09:45, ema deskonesidu ida sona vítima Damazio Correia Guterres, rezulta kanek grave no sei baixa hela iha Hospital Nasionál Guido Valadares (HNGV).
“Maibé, ita seidauk rekolla informasaun barak, tanba ita-nia vítima ne’e, nia kondisaun labele para fó informasaun, tanba laiha sasin ruma iha fatin akontesimentu, maibé ita iha meius seluk ita la bele ko’alia sai, tanba segredu justisa, ita hein vítima, bainhira ko’alia mak foin ita hetan kronolojia husi akontesimentu ne’e rasik, para ita junta prosesu sira ne’e,” nia heteten iha knaar Fatin Komandu PNTL Munisípiu Dili, Tersa (09/01).
Tan ne’e, sira-nia parte sei hein hela vítima Damazio Correia Guterres nia kondisaun di’ak, hafoin bele husu informasaun ba nia kona-ba akontesimentu ba nian.
3,600 total views, 3 views today
Bele hare Video Seluk :
Subscribe to Timorpost
