DILI, (timorpost.com) – Polísia Nasionál Timor-Leste (PNTL) liuhosi Unidade Polísia Marítima (UPM) deteta timoroan balun sei organiza malu na’uk Ai-kameli iha rai-laran fa’an ilegál ba nasaun seluk, tanba ne’e UPM mantein vizilánsia no sei kaer autór sira.
“Tuir informasaun ne’ebé ita-nia servisu sekreta marítima informa, deskonfia ita-nia timoroan balu daudauk ne’e foti Ai-kameli iha fatin-fatin, hodi fa’an ilegál ba nasaun seluk, tanba ne’e ami-nia ekipa halo kontrolu para atu ka’er”, Komandante UPM, Superintendente Polísia, Eugenio Pereira, informa ba Timor Post iha nia kna’ar fatin, Kuartel UPM Lesidere, Segunda, (27/11/2023).
Nia hatutan, “Ami deskonfia grupu timoroan sira-nia atividade foti Ai-kameli ne’e iha to’os ka iha ne’ebé, talves laiha kuñesimentu ka laiha autorizasaun husi parte Floresta”.
Husi informasaun hirak ne’e, UPM sei halo planu operasaun ba área tama sai negósiu ilegál sira atu bele deteta aktu ilegál ne’ebé sein autorizasaun husi Governu.
“Ita deskonfia timoroan sira ne’e tanba iha faktu balun ne’ebé ami rekolla katak, timoroan sira ne’e lori Ai-kameli atu halo esportasaun ilegalmente, la ho autorizasaun Governu”,nia hatete.
Tanba ne’e, Komandu UPM, orienta ona, tantu servisu sekreta UPM, seksaun operasaun UPM para halo patrullamentu rutina hodi halo vizilánsia maka’as ba atividade ilegál sira.(*)
1,083 total views, 3 views today
Bele hare Video Seluk :
Subscribe to Timorpost
