DILI (timorpost.com)— Relasiona ho komemorasaun loron Restaurasaun Independénsia ba dala ruanulu resin-ida (XXI), Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek” husu ba joven sira presiza muda mentalidade.
Nia hato’o asuntu ne’e ba jornalista sira hafoin partisipa iha komemorasaun loron Restaurasaun Independénsia ba dala XXI iha Palásiu Prezidensiál, Bairru-Pité, Sábadu (20/05/2023).
“Joven sira agora ne’e, ha’u haree iha ona mudansa, sira komesa matenek ona, sira-nia aman no avó sira uluk iha rezisténsia nia laran, sira-nia hahalok komesa di’ak ona, presiza sira agora muda sira-nia mentalidade,” nia hateten.
Nia hatutan, joven sira tenke hetan edukasaun formal, labele edukasaun informal.
Alende ne’e, tuir nia haree katak, serimónia ohin kapás liu no sira komisaun organizadór ne’e merese para fó parabéns ba sira, maski organiza buat simples, mais diskorre di’ak hotu.
“Husi parte militár nian, ohin failla uitoan iha, mais depois ha’u sei hadi’a no komandante batallaun aprezenta difikuldade uitoan, mais laiha buat ida ami sei kurize,” nia rekoñese.
Iha fatin hanesan, Fundasaun Mahein (FM), Abel Amaral, hatete primeiru fundasaun mahein hakarak hato’o parabéns ba Timoroan no eroi hotu.
“Ita hakarak hato’o ita-nia parabéns ba eroi hotu, tanba sira-nia luta mak ohin loron ita hetan naroman no timor oan hotu bele sente independénsia nia di’ak,” nia hakotu.
1,160 total views, 3 views today
