OEKUSI (timorpost.com) – Organizasaun Internasionál Traballu (ILO-sigla Inglés) no Fundu Nasoins Unidas ba labarik (UNICEF-sigla Inglés) renova ona sira nia apelu ba priorizasaun rede seguransa sosiál no prestasaun servisu sosiál ho kualidade hodi tulun proteje labarik sira hasoru forma traballu infantíl ne’ebé aat liu iha Timor-Leste (TL).
Ajénsia ONU rua ne’e husu liután Governu atu konsidera adopsaun ba projetu Planu Asaun Nasionál Timor-Leste nian (PAN) hasoru forma traballu infantíl ne’ebé aat liu, ne’ebé sei tulun define atividade sira ne’ebé klasifika hanesan traballu infantíl no lista servisu balun tan, ne’ebé sei estraga labarik sira.
Apelu ne’e hala’o iha Rejiaun Administrativa Espesiál Oe-cusse Ambeno (RAEOA), durante eventu komemorasaun loron Mundial Kontra Traballu Infantíl, ne’ebé komemora iha loron 12 fulan Juñu iha mundu tomak.
Iha Timor-Leste, ezbosu Planu Asaun Nasionál ba traballu infantíl, ne’ebé mak iha ona meza Ministru Koordenadór Asuntu Ekonómiku ba aprovasaun, sei fó orientasaun ne’ebé presiza tebes ba nasaun atu responde no prevene forma traballu infantíl ne’ebé aat liu.
“Ami hakarak hato’o fila-fali ami-nia apelu ba ratifikasaun PAN ida-ne’e lalais liu atu nune’e bele sai hanesan matadalan ba Governu no setór sira ne’ebé iha relasaun ho Governu atu servisu no kontribui ba eliminasaun traballu infantile iha Timor-Leste,” hateten Reprezentante ILO ba Indonézia no Timor-Leste, Michiko Miyamoto.
Traballu ba infantíl, ne’ebé refere ba servisu ne’ebé aat ba dezenvolvimentu fíziku no mental ba labarik ida, aumenta ona iha Timor-Leste tanba kiak uma-kain ne’ebé aas liu, ne’ebé obriga inan-aman barak liu atu haruka sira-nia oan sai hodi hetan osan adisionál ba despeza uma-kain nian.
Aleinde ne’e, impaktu sosiál no ekonómiku husi Pandemia Covid-19 no inflasaun nu’udar rezultadu husi krize Rusia-Ukrania nian, aumenta ona estrese ba rendimentu uma-kain nian no dudu labarik barak liu ba atividade ekonómika sira.
Tuir peskiza Nasionál Traballu Infantíl 2016 nian, labarik liu 67.688 ho idade tinan 5 to’o 17 ka labarik porsentu 16 iha grupu idade ida-ne’e envolve iha forma atividade ekonómika balun.
Peskiza ne’e hatudu tan katak labarik na’in-52.651 mak klasifika hanesan envolve iha traballu infantíl, ho porsentu 10 husi labarik sira-ne’e mak tinan 5 to’o tinan 12.
“Labarik barak kontinua nafatin ladún la goza sira nia infantisidade, sira-nia potensialidade no sira-nia dignidade tanba sira gasta oras ne’ebé la iha rohan hodi envolve iha atividade ekonómika perigu sira,” dehan Reprezentante País UNICEF, Bilal Aurang Zeb Durrani.
Matadalan husi kometimentu internasionál, ne’ebé Timor-Leste halo liuhusi ratifikasaun Konvensaun Direitu Labarik iha 2003, ita tenke foti pasu urjente sira hodi hapara problema ne’e.
Atu troka tendénsia ida-ne’e, ILO no UNICEF halo advokasia ba aumentu rede seguransa protesaun sosiál hanesan rejime kréditu ba família vulneravel sira.
Aleinde ne’e, hadi’a asesu ba kualidade servisu sosiál sira hanesan edukasaun no empregu ne’ebé di’ak ba ema adultu sira mós sei hasai família sira husi xoke ekonómiku no proteje labarik sira husi traballu infantíl.
ILO no UNICEF iha kompromisu atu servisu hamutuk ho Governu no Sosiedade Sivíl hodi halo inan-aman sira sente sensivel kona-ba natureza traballu infantíl no atu ajuda sira komprende kona-ba efeitu aat husi prátika ne’e.
2,189 total views, 3 views today
Bele hare Video Seluk :
Subscribe to Timorpost
