DILI (timorpost.com)—Organizasaun Noun Governamentál (ONG) Saúde Ba Ema Hotu (SABEH) liu husi dadus survey hatudu kuaze 138 Suku iha territóriu nasional seidauk eziste Postu Saúde inklui menus rekursu umanu.
Diretór Ezekutivu SABEH, Andre Belo, hatete, durante SABEH hala’o survey ba Postu Saúde no Sentru Saúde hamutuk 26 ne’e rekursu umanu seidauk sufisiente no problema stock out ai-moruk inklui planeamentu familiár ladún másimu.
“Problema mak kuaze 138 Suku ne’ebé seidauk iha Postu Saúde ne’e iha territóriu laran tomak,” Diretór ne’e informa, ba Jornalista iha knaar fatin Kaikoli, Kuarta (20/09/2023).
Nia haktuir, kada Suku tenke iha Postu Saúde ida ne’e importante ba komunidade bele asesu ba fasilidade saúde.
Maibé, nia dehan, tenke tau rekursu umanu hanesan, Parteira, Médiku Jerál no Doutór hodi bele atende pasiente sira.
“Husi survey ne’e mós hatudu kuaze Postu Saúde 96 menus rekursu umanu. Tuir kritériu saúde nian tenke iha Parteira, Médiku Jerál, Doutór no Saúde Públiku, ne’e balun de’it no balun seidauk”. Nia haktuir.
Tanba ne’e, husu ba Governu parte Ministériu Saúde (MS) asegura lalais nune’e servisu equilibrium ba komunidade sira ne’ebé iha area rural. Tanba rekursu umanu no fasilidade fó impaktu ba atendimentu saúde nian.
Entretantu, Postu Saúde no Sentru Saúde hamutuk 639 no Suku hamutuk 452 no 2.233 Aldeia iha territóriu nasionál.
870 total views, 9 views today
Bele hare Video Seluk :
Subscribe to Timorpost
