Ita moris tuir no iha tempo. No tempo ne’e ita bele hafahe ba dimensaun tolu: tempo pasado nu’udar historia, tempo agora nuudar realidade nebe ita hasouru dau-daun no tempo futuru ne’ebe sei iha mehi, plano no esperansa. Tempo pasado katak the past, buat hotu ne’ebe liu tiha ona, labele hasouru tan: ohin meudia, ohin dader, horikalan, horisehik, semana kotuk, fulan kotuk, tinan kotuk no buat hotu nebe iha kotuk. Tempo pasado mak ita rekonhese nu’udar historia ne’ebe ita labele halo fila-fali no ita labele manipula ou muda tuir ita nia hakarak no hanorn agora. Saida mak akontese uluk, saida mak ita halo iha ita nia moris nee sai riil tuir nia tempo no loron ida sei sai historia. Sai historia diak ka aat, depende oinsa esperiensia sira ne’e fo valor ka fo beneficio ba ita nia moris. Historia ne’ebe diak sempre tan nia resultado diak no halo laran ksolok. Iha parte seluk, historia aat sira halo ita laran moras no dalaruma halo lakon esperansa.
Tempo agora katak buat ne’ebe ita hasouro dau-daun. Tempo agora ne’e real, maibe badak no liu lalais deit; tanba wainhira ita to’o agora, la orastan ou la kleurtan nia mos sai pasado. Tempo agora hanesan ita piska matan, derpente liu tiha ona no sai pasado ona. Ita so bele konta deit, ohin hau piska matan. Liu lalais deit. Agora ne’e mak wainhira ita tur hamutuk, kaer liman ba malu, hare malu, rona malu, hateke ba malu no lalais deit, labele repete tan. Aksaun ita bele halo repete, maibe nia sentido sempre diferente. Hau bele repete hau nia liafuan, maibe hau labele repete hau nia ekspresaun hanesan ohin. Hau bele repete hamrik ka tuur iha fatin ida, maibe hau labele repete ninia sentido no sentimento saida mak iha wainhira hau hamrik ou tuur uluk nian. Hau bele repete tuur hamutuk ka kaer liman ba malu ho ema seluk, maibe kada tempo iha ninia sentido ne’ebe diferente.
No tempo agora mak eksperiencia ne’ebe real, tan ne’e ita persija agradese. Ita sei bele dada iis, ita sei bele hateke malu, ita sei bele hase malu, ita sei bele tuir misa, ita sei bele akompania tinan 2023 to’o remata; ne’e grasa boot ida husi Maromak no husi tempo ne’ebe sempre muda. Keta haluha, ema barak uluk hakarak atu moris to ohin, maibe la konsege tan Maromak bolu uluk ona. Tan ne’e agradese ba moris ne’ebe lori ita husi pasado to’o agora, husi tinan 2023 hahu, to’o ohin ita tama ninia ninin. Ho haksolok, ita bele hateten ba tinan 2023, o nia ninin mak ne’e, rohan mak ne’e; agradese Nai.
Tempo Agora ne’e hanesan tempo ikus nian ba ita hodi lembra fila-fali ba ita nia pasado, lembra historia uluk nian, hodi halo estrategia foun agora halo preparasaun ba futuru, plano aban ita halo oinsa. Lembra ba pasado ne’e laos katak ita hakarak atu fila-fali ba moris pasado nian. Lae! Ne’e labele ona. Buat ne’ebe liu, husik nia liu ona. Ita nia moris pasado diak ka aat, ita labele muda ona. Buat diak ita agradese, buat ne’ebe halo ita la satisfas ou la diak, ita mos agradese. Esperiencia pasado bele sai hanesan “Manorin ida” ba ita, hodi prepara no forma moris futuru ne’ebe diak liu tan. Ita aprende husi sukses tempo pasado atu oinsa ita sai sukses liu tan iha tempo futuru; ita aprende husi esperiensia terus uluk ka horseik hodi prepara ba futuro atu labele monu tan iha sala ne’ebe hanesan pasado nian.
Ita mos labele kompara moris uluk nian ho moris agora, sa tan kompara ho moris ne’ebe seidauk akontese iha fuuru. Keta mos depende liu ba “romantismo pasadu/romantisme masa lalu” ita labele fila-fali ba sukses iha tempo liu ba. Tan wainhira ita “gaba-an demais ba ita nia sukses iha pasado, hodi kompara ho moris agora, ikus ita “halo-an” katak ita uluk diak liu ohin no aban, “ami nia jerasaun uluk diak liu agora”. Hanoin ba pasado, bele! Maibe orienta ita nia moris ba esperiensia pasado mak labele! Se lae, ita fila kotuk, la lao ba oin. Tansa, ema dehan, “berubah itu, maju! Bukan mundur! Mudansa ne’e tengke ba oin; kuando ba kotuk ne’e naran hakiduk no ikus sei fila kotuk no mout iha romantismo tempo antigo nian. Ita gerasaun tuan nia moras mak ne’e, sempre kompara moris uluk ho agora no sempre “gaba” moris uluk diak liu agora; seolah-olah gerasaun agora la vale/la halo buat diak ida, so uluk deit.
Tempo futuru ita rekonhese nu’udar plano, mehi no eseperansa. Buat hotu seidauk real; dalaruma sei iha hanoin, maibe dala ruma mos sei mamuk hela. Tempo uluk no tempo agora, konsege mos “sai futuru ba pasado-future for he past”. Iha tinan 2022, ita iha plano no mehi barak atu ita bele halo iha tinan 2023. Maibe balun konsege ita halo, balun la konsege. Husi buat hirak ne’ebe ita halo mos, balun iha resultado diak, maibe balon mos halo laran moras. Buat ne’e normal! Ema dehan “Ita bele halo plano atu halo saida aban, maibe ita labele desidi saida mak akontese: Kita bisa merencanakan apa yang akan kita lakukan besok, namun kita tidak bisa menentukan apa yang akan terjadi”.
Tempo futuru ne’e sei misterio. Ita la hatene saida mak akontese. Agora tempo ikus ona, katak tinan 2023 remata ona, no ita atu tama iha tinan 2024. Ita taka tinan tuan ho agradesemento ba buat hotu ne’ebe ita hetan, buat hotu ne’ebe akontese iha pasado. Buat importante ne’ebe ita persija atu halo agora mak, ita prepara-an, ita halo plano ba futuru mos ita entrega buat misterio futuru ba Na’in ba Misterio katak Maromak. So Maromak mak hatene saida mak atu akontesi ba moris, ba mundo iha tempo tuir mai.
Ita tama iha tinan foun, hanesan ema laorai tama iha ailaran ne’ebe lahatene ninian ninin no nia rohan iha nebe. Ita so bele siik deit tuir feeling, tuir konsciencia. Direção errada, podemos nos perder! Salah arah, kita bisa tersesat, no ikus lakon esperansa. Tanba ne’e, ita persiza mata dalan diak ou bukae ne’ebe halo ita iha fontade atu kria dalan ita nian ne’ebe bele lori ita ba diak no iha esperansa. Ita bele aprende husi tempo pasado, katak esperiensia iha tinan liu ba bele sai manorin ba ita atu halao tinan 2024 ho diak.
Husi leiturgia misa taka tinan tuan nian, ita bele sita mesagem furak husi “Sagrada Scritura” nu’udar Maromak Nia liafuan ba ita atu sai bukae ba moris loron-loron, liu-liu iha tempo futuru.
Primeiro, Matenek Spiritual, matan moris, neon nain wainhira hasouru buat foun. Ema hateten, “tidak semua yang indah itu baik, tapi semua yang baik pasti indah!” Katak, laos buat hotu ne’ebe furak iha ita nia matan, diak ba moris! Maibe buat sira ne’ebe diak, sempre furak. Bahasa Indonesia hateten tam, “tidak semua yang ada di antara kita adalah orang kita, karena kadang yang ada di antara kita adalah musuh. Kadang musuh itu ada dalam selimut.” Sira ne’ebe sempre hamutuk ho ita la outamatikalmente katak sira ita nian. Tanba funubaluk mos dalaruma tur hamutuk ou toba hamutuk ho ita iha manta ida nia laran. Sto. Joaun iha nia primeira karta, fo hanoin ba ita katak: “matan moris, neon nain” ba sira ne’ebe hasouru ou Anti Kristo. Hahalok Anti Kristo ne’e la signifika katak sira ne’ebe la fiar Kristo, bele mos ita; ita sira ne’ebe dehan fiar ba Kristo maibe hahalok la tuir ho fiar, bele mos mosu iha ita nia familia laran ne’ebe sempre lori ita ba dalan aat. Joaun dehan: “Oras ne’e mosu dadaun ona ema wain be hasouru Kristo/Anti Kristus. Sira sai husi ita nia leet, maibe sira laos husi ita; Sira ita nia maluk karik, sira sei hela ho ita.” Ho liafuan ida ne’e Joaun hakarak fo hanoin ba ita atu matan moris no neon nain nafatin. Maibe Nia mos konfia katak, tan ita simu ona Spirito Santo husi Maromak, ita mos tengke sai matenek, hodi tetu no hili atu tuir buat nebe loos. Ho grasa Maromak, ita hatene ona lialos, hatene lia bosok, tan ne’e persija atu hatudu lialos. Ne’e mak matenek iha Kristo, hatene tuir liolos hodi evita tuir lia bosok. Matenek ida ne’ebe loos mak mai husi Kristo.
Segundo, Moris iha Naroman no moris nu’udar Naroman. Kalan ida hau hasouro katuas ida ne’ebe matan delek. Maibe interesan, maski Nia matan delek, Nia nafatin lao, uja lampra. Wainhira hau husu, tan sa nia uja lampra maski nia labele hare. Nia hatan, “hau persija lampra, hau persija naroman atu nune’e ema bele hare hau no labele soke hau”. Dalabarak, ema sira nebe matan delek ne’ebe loos ne’e mak ita ne’ebe matan diak maibe labele ou lakou ou la preokupa ho ema seluk ni moris no necesidade. Ema matan delek ne’e genuine, nia hetan naroman husi Maromak. Maski fisikalmente nia iha limitasaun, nia mos hetan naroman no matenek husi Maromak. No ikus nia mos sai naroman nebe hatudu dalan ba ba ema seluk. Nia hanorin hau atu sai naroman ba ema seluk. Ita hakarak lao to rohan karik, labele lao iha nakukun, labele subar-an. Husik ema hare ita. Ema hare ita ne’e iha beneficio barak: ema konhese ita, ema bele ajuda ita wainhira ita monu, ou ema bele tuir ita nia lalatak ka ain fatin. La iha ema ne’ebe moris ba nia-an rasik deit.
Terseiro: hatene fatin sadere-an. Ema matenek barak, maibe ikus nia matenek lori nia ba aat. Hare deit iha nasaun barak, sira ne’ebe tama komarka tan Korupsaun ne’e mesak ema matenek, sekolah mesak boot hotu. Matenek balun mos ikus sei moras mental, tanba hanoin barak, aas no boot maibe kapasidade la too. Ikus stres, moras mental no sai bulak. Ema riku iha mundo ne’e barak, maibe ikus rikusoin mak hafalun to’o harahun sira nia moris. Sira hanoin katak, ho sira nia rikusoin sira bele sosa buat hotu-hotu. Afinal moris la haksolok no ikus sira mout iha sira nia rikusoin laran hanesan historia laho mate tan bosu; tikus mati di lumbung padi karena kekenyangan. Barak ema bonito/bonita, maibe ikus sai vitima tan uja sala no kompriende salah kona ba bonita/o iha moris. Ema hetan posisaun aas iha kompanha ka nasaun barak, maibe moris la hakmatek tan hanoin barak; ikus la kontrola-an no sai moras. Familia barak to iha dalan diforcio, tan la preokupa ho domin loos nian, maibe sukat moris ba income; too ikus familia rahun tan la fiar malu. Balun ema matenek, riku, bonito/a, talento barak, naran sai boot hanesan sai person ida ne’ebe perfeito. Nia hanoin katak ho sira ne’e, nia bele sosa mundo no nia buat diak sira, maibe ikus nia moris iha susar laran. Ita hare moris diak, maibe realidade nia subar moras barak.
Buat sira ne’e normal hotu: ita hakarak sai matenek ne tengkiser. Ita hakarak sai riku, ne’e diak liutan. Ita hakarak “hatudu ita nia furak” bonito/bonita ne normal no la iha regras ne’ebe bando! Ita hakaas-an atu sai ema boot, naran boot mos normal no ita hotu hakarak buka. Maibe, tengke uja dalan ida ne’ebe diak no digno. Atu labele ‘tane aas ita nia egoismo to haluha katak ema seluk mos iha. Ita hakarak sai boot karik, labele ho hanehan ema seluk. Ita hakarak sai iha fatin aas karik, labele ho sama ema seluk nia ulun; ita hakarak sai naran boot no ema gaba ita karik, labele ho konta aat ka hafoer ema seluk nia naran; hakarak sukses karik labele ho korta ema seluk nia dalan. No importante liu mak: atu ita nia buat diak ne’e permanente, tengke sadere-an iha airin ida ne’ebe metin: katak Maromak.
Wainhira ita sadere-an iha Maromak, garante katak ita metin nafatin. Anin bele huu makas, laloran bele sae aas, rai lakan bele tarutu makaas, rai bele nakdoko makaas, maibe wainhira ita sadere-an ba Maromak, ita fiar katak ita metin no hakmatek. Ita fiar ba Maromak la signifika no la garante katak ita nia moris sai diak liu ema seluk; laos mos automatikalmente ita sees-an husi buat aat sira; la garante mos ita bele hetan buat diak ho fasil ka sai riku. Ita fiar Maromak no sadere-an iha Nia ho garante katak ita sei hamrik metin iha tempo susar, ita sei bele hamnasa iha tempo dificil. Espera katak iha tinan 2024, ita hetan moris diak liu iha tinan pasado nian.
Culuhun, 31 de Dec. 2023
Pe. Wendly Marot, SVD
5,287 total views, 42 views today
Bele hare Video Seluk :
Subscribe to Timorpost
